Drim ngai 30/06, tàm ƀòn dờng Hồ Chí Minh neh geh bơyai lơh Dơ̆ yal ală Jơnau lơh nền tàm pơrjum, Jơnau lơh nền bơh Dà lơgar mờ ƀòn lơgar bè tơmŭt bal mpồl lơh broă sră pơ àr gơnoar atbồ kấp càr, kấp sàh, tơn jơh lơh broă mpồl lơh broă sră pơ àr gơnoar atbồ kấp kơnhoàl, tơnggơs mpồl Đảng, sồr kấp ủy, Mpồl duh broă Làng bol, Anih duh broă Làng bol, Anih duh broă Mặt trận Dà lơgar Việt Nam ƀòn dờng Hồ Chí Minh, sàh, sơnah ƀòn, tiah is ồn. Ƀòn dờng Hồ Chí Minh rề ơnàng, geh ƀòn dờng Hồ Chí Minh, càr Bình Dương mờ càr Bà Rịa – Vũng Tàu.

Tàm pơrjum, Tổng Ƀí thư ồng Tô Lâm neh jơh nùs jàu Jơnau lơh nền bơh Ƀộ Cíñ trị dê sồr ồng Nguyễn Văn Nên - Kwang bàng Ƀộ Cíñ trị, Ƀí thư Thàñ ủy ƀòn dờng Hồ Chí Minh - at gơnoar broă Ƀí thư Thàñ ủy ƀòn dờng Hồ Chí Minh tơnơ̆ tŭ tơmŭt bal. Mờ Ƀộ Cíñ trị kung sồr 4 Phó Ƀí thư Thàñ ủy ƀòn dờng Hồ Chí Minh. Đơs tàm dơ̆ jàu Jơnau lơh nền, Tổng Ƀí thư ồng Tô Lâm đơs nền, dơ̆ yal ờ mìng là broă lơh bè bơta sră pơ àr gơnoar atbồ lơm, mờ là cơnđoà jơng lòt tam gơl să kwơ màng, là sồr pal geh ală bơta di ngan bơh làng bol mờ Dà lơgar dê tàm sră pơ àr gơnoar atbồ bơt bơtàu ală tiah gơn kơnờm bơtàu tơnguh bơh Dà lơgar mờ tàm tiah do dê, nàng di pal mờ bơta kơ̆p kờñ “Việt Nam dờng pràn tàm nam 2045”.