Jăt jơnau yal, ală nam do, càr Gia Lai neh ngui niam ală bơta geh, bơta pràn, lơh geh ală cồng nha kwơ màng, tơl ală bơta, gàr kơl jăp broă lơh jŏ jòng bè cíñ trị, sền gàr dà lơgar, lơngăp lơngai; broă lơh sa tam gơl niam, di gùng dà broă lơh, gơguh lơh sa geh 6,21% tàm 1 nam, broă lơh sa gơguh uă rơlao 2 dơ̆ pơndrờm mờ bồ tơngai lơh broă. tơnơ̆ mờ tŭ neh ai tơngŏ loh ală bơta geh, bơta pràn geh pơnrơ ngan càr dê, Tổng Ƀí thư ồng Tô Lâm đơs loh nùs nhơm bơh Đảng, Dà lơgar dê bè jơnau kờñ gơguh bal mờ bơtàu tơnguh ai geh càr Gia Lai dê là uă ngan.

Tổng Ƀí thư sồr càr Gia Lai sền wơl ală khà broă, kơnòl broă lơh, gùng dà broă lơh mùl màl, bơsong ală bơta kal ke gơkòl bơtàu tơnguh, lơh ngan lơh geh tàm khà uă ngan ală jơnau kờñ, kơnòl broă mờ Jơnau lơh nền bơh Đảng ƀộ càr XVI neh geh ai. Tơrgùm đơng lam, rơcang niam ală bơta geh nàng bơyai lơh geh cồng nha pơrjum dờng đảng ƀộ ală kấp mờ Pơrjum dờng Đảng ƀộ dơ̆ XVII. Di tàm dơ̆ do, Tổng Ƀí thư ồng Tô Lâm neh jào pà broă lơh Hìu sơnơm ai sàh Glar, kơnhoàl Đăk Đoa in mờ khà 5 tơmàn đong.