Đơs tàm dơ̆ lơh broă, Tổng Ƀí thư ồng Tô Lâm đơs nền, nàng lơh sa- mpồl bơtiàn bơtàu tơnguh kơ̆ mờ kơnhăp kờñ bơta mŭt lơh bal bơh jơh ală anih lơh broă cíñ trị dê, bơta tus bal jơh nùs bơh ală bơnah lơh sa mờ làng bol dê, nàng lơh geh bơta do bơta kwơmàng ngan là lơh sir cơng tàng kơrnoăt boh lam bè gùng dà broă lơh gơhòi gơ jà bơcri priă mờ bơtàu tơngguh lơh sa.

Jăt Tổng Ƀí thư bơta kờñ lơh mơ tơn là lơh niam wơl tiah bơcri priă kă bro, pơnđơl tơrmù êt ngan bơh 30% priă tă kă bro, sră pơ àr gơnoar ătbồ mờ sang tĕ êt ngan bơh 30% bơta pal geh kă bro ờ duh kờñ pal geh; pơnđơl tàm 2 tus 3 nam tus tiah bơcri priă kă bro lơgar he dê ơm dơ̆ pe tàm Kơnhoàl ù tiah Asean. Bal mờ hơ̆, pal khin cha, kràn cê jơh nùs jăt ngui tam gơl sồ, tam gơl pa bơceh lơh, ală gùng dà krơi is bè priă jền; pơn jăt tai dan tơngume kơrnoăt boh lam is ai ală Tiah lơh sa is tàm bàr pe ƀòn dờng dờng in; gùng dà ai lài is ồn, gùng dà krơi is tàm broă bơsong ală tam pìt tam phà kă bro phan; geh gùng dà broă lơh bè ù tiah, hìu đam chồl tơngguh tiah drà là gơn kơnờm gơguh bơh dà lơgar dê.