Tổng Ƀí thư ồng Tô Lâm, Thủ tướng ồng Phạm Minh Chính, Củ tịc Quốk hội ồng Trần Thanh Mẫn bal mờ ală kwang bàng tàm Ƀộ Cíñ trị, Ƀí thư Đảng Dà lơgar tus bal. Tổng Ƀí thư ồng Tô Lâm pà git, bơsram mìng dùl tơngu me bè jăk chài măi mok, tam gơl pa bơceh lơh mờ tam gơl sồ dà lơgar geh tàm broă rơndăp lơh, broă lơh broă bơh Ƀộ Cíñ trị, Mpồl Đơng lam Đảng Dà lơgar dê, do là broă lơh mùl màl, ai tơngŏ broă lơh jơh nùs uă ngan bơh đơng lam Đảng, Dà lơgar dê lơh jăt geh cồng nha Jơnau lơh nền tàm pơrjum sồ 57 Ƀộ Cíñ trị dê.

Nàng đơng lam, sồr lơh mờ lam lơh jăt geh cồng nha Jơnau lơh nền tàm pơrjum do den să tờm ală kwang bàng tàm Ƀộ Cíñ trị,  kwang bàng tàm Mpồl Đơng lam Đảng Dà lơgar lam lài tàm broă jòi tơrgùm jơnau git wă gơ wèt mờ gah broă pa, kal ke mờ tam gơl sùm do. Tổng Ƀí thư jào Đảng ủy Cíñ phủ mờ Cơl dŭ lơh broă Đảng Dà lơgar, anih lơh broă sùm bơh Mpồl Sồr lơh Dà lơgar dê bè bơtàu tơnguh jăk chài, măi mok, tam gơl pa bơceh lơh mờ tam gơl sồ git wă tơl jơnau đơs bơh ală kwang bàng tàm Ƀộ Cíñ trị, Ƀí thư Đảng Dà lơgar dê nàng bơtơl, lơh gơs jơnau yal drơng ai pơrjum Dà lơgar dơ̆ 11 tus do in, tàm hơ̆ pal tơnkah ngan là tơrgùm ală gùng dà broă lơh pa tàm dunia bè jăk chài măi mok, tam gơl sồ, tam gơl pa bơceh lơh, ai gĭt ală bơta mùl màl ngan ală broă lơh bơsong nàng lam lơh jăt geh cồng nha Jơnau lơh nền tàm pơrjum sồ 57 Ƀộ Cíñ trị dê tàm tơngai tus.