Dơ̆ pơrjum bơyai geh lơh tàm nùs nhơm lơh bơyô bal, jơh nùs mờ song dơ pă. Bàr nă Tổng Ƀí thư đơs niam ngan bơta bơtàu tơngguh uă ngan bơh gĭt gơ̆p 2 Đảng, 2 lơgar dê tơngai lài jăt jơnau đơs “6 rlau”. Ală dơ̆ boh bơr kwơmàng geh lơh sùm, lơh broă bal lơh sa- kă bro phan pơn jăt tai gơguh niam ngan, bal mờ uă bơta pơnrơ tàm lơh broă bal niam chài, bơto bơtê, lòt nhơl mờ tìp măt lơh kwèng ƀòn lơgar. Bàr đah kung lơh broă bal niam tàm ală anih cribơyai uă gah, lơh sùm tơm bơh bơr sơrmah sơrmài bè ală broă gam gơkòl.

Tổng Ƀí thư ồng Tô Lâm sồr tơngguh tai lơh broă bal tàm ală broă kwơmàng bè sền gàr dà lơgar, cribơyai broă mờ lơgar ndai, măy mŏk, tam gơl sồ mờ sền gàr tiah ơm kis. Is ồn, Tổng Ƀí thư ồng Tô Lâm đơs sùm pal lơh mhar tơngai lơh rơndăp broă lơh gùng rơndeh ồs Lào Cai – Hà Nội – Hải Phòng, chồl tơngguh kă bro phan tàm pơnring bal mờ bơcri priă cồng nha uă. Tơnơ̆ pơrjum bơyai, bàr nă Tổng Ƀí thư neh sền gŏ yal tơngĭt 45 sră nggal lơh broă bal geh kĭ hơ, yal wơl cồng nha tơl làm bơh dơ̆ lòt còp dê.