Tổng Ƀí thư đơs sùm, tơnơ̆ 66 nam lơh jat jơnau bơto sồr bơh Củ tịc Hồ Chí Minh dê, sa tềp tam chi neh gơ gơs là bơhiàn niam, pơgồp bơnah lơh tam gơl muh mat dà lơgar, tam gơl tiah ơm kis mờ tơnguh bơta niam rài kis làng bol dê. Tam tai dùl tờm chi là pơyua tai bơta pin dờn tàm tơnơ̆ do bơtàu tơnguh kơ̆ kơljap jŏ jòng sùm. 

Đơs nền gùng dà sồr lơh sùm bơh Đảng mờ Dà lơgar dê là bơtàu tơnguh lơh sa ờ tam gơl tiah ơm kis, bơt bơtàu tiah drà pa mơya pal sền gàr “klờm soh tơlir”, Tổng Ƀí thư sồr càr lơgar ờ gŏ di lơh ur ar, ờ ngan ngồn, pơhì pơhà, gàr “tam chi lơi, kis niam tờm chi hơ̆”. Broă tam chi pal gơ jat bal mờ rơndap ù tiah, sơngka sền gàr jŏ jòng, ndrờm bal mờ bơtàu tơnguh phan bơna tiah dà tơlir, ngac ngar. Jat broă rơndap lơh, tus lồi nhai 3, Hà Nội lơh ngan tam bơh 80 rbô tus 100 rbô tờm chi mờ mờr 400 rbô tờm chi tàm gùt nam 2026.