Drim òr (03/02), Cơl dŭ lơh broă Đảng Dà lơgar neh bơyai lơh tìp măt “Chờ gờm Đảng-Chờ gờm Nam pa”, chờ gờm Satềp kwang bàng, kông cứk, cau lơh broă Cơl dŭ lơh broă Đảng Dà lơgar. Ala măt Ƀộ Cíñ trị, Mpồl Đơng lam Đảng Dà lơgar, Tổng Ƀí thư ồng Tô Lâm đơs niam ală cồng nha mờ kwang bàng, kông cứk, viên cứk cau lơh broă tàm Cơl dŭ lơh broă Đảng Dà lơgar neh lơh geh tàm broă pơlam, drơng broă đơng lam, sồr lơh bơh Đảng, Ƀộ Cíñ trị, Mpồl Đơng lam Đảng Dà lơgar dê.

Tổng Ƀí thư pà git, bơh tàm ngai lơh broă sơnrờp ngan tàm nam pa Ất Tỵ, Cơl dŭ lơh broă Đảng Dà lơgar bơyai lơh wơl, mờ gơnoar broă, kơnòl broă pa. Bè kơnòl broă tàm tơngai tus, nàng di pal mờ jơnau kờñ đơng lam, sồr lơh bơh Đảng mờ Dà lơgar dê, Tổng Ƀí thư ồng Tô Lâm sồr, Cơl dŭ lơh broă Đảng Dà lơgar pơn jăt tai lơh niam gơnoar, kơnòl broă bơh să tờm dê, đòm jăt bơhiàn tam klăc bal, lơh ngan lơh geh ală jơnau kờñ neh geh ai mờ bơta niam, cồng nha geh uă rơlao mờ nam 2024, lơh gơs jăk chài kơnòl broă Mpồl duh broă Đảng Dà lơgar, Ƀộ Cíñ trị, Mpồl Đơng lam Đảng Dà lơgar pin dờn jào broă.