Tàm dơ̆ lam lơh, kwang đơng lam bồ càr Hưng Yên pà gĭt, bơh nam 2022 tus tŭ do, jơh gùt càr neh tam geh rlau 126 rơbô tờm chi. Tàm hơ̆ nam 2024, jơh gùt càr Hưng Yên neh tam geh rlau 38 rơbô 400 tờm chi, neh lơh geh 185 gơl gùng geh tờm chi pa; ală tiah drà, ală tiah, mpồl lơh sa mờ măi mok, tiah làng bol ơm kis ƀòn lơgar, hìu bơsram, hìu sơnơm, anih lơh broă, tiah tềl lời wơl kah yau – niam chài ndrờm jơh nùs lơh jat niam broă tam chi. Kờp jơh priă tă tam chi làng bol tus tŭ do là 92 tơmàn 600 tơlak đong.

Tàm tơngai tus, càr Hưng Yên pơnđơl pràn lơh ngan geh jơh tờm chi tàm ală gơl gùng lòt rê tàm ù tiah do dê mờ gàr niam lơh geh jơnau sồr ƀòn lơgar pa tơnguh uă gơwèt mờ kấp xã, kấp kơnhoàl mờ kấp càr, mơkung pơn jat tai sơng ka sền gàr ală bơta tờm chi neh tam nàng lơh geh ù tiah tơlir- sàng goh- niam; sơlơ tơnguh tai lòt sền, bơto pơlam, sồr lơh mhar ală tiah; ală anih lơh broă, mpồl lơh sa kă bro lơh jat niam broă lơh tam tờm chi jat Broă rơndăp lơh neh geh ai.