Tơnơ̆ 4 nam lam lơh bơ̆t bơtàu 2 broă bơ̆t bơtàu kwơmàng bơh Hìu sơnơm Dà lơgar Mpồl ling klàng 108 ngan ngồn mŭt lơh broă; tơl broă bơ̆t bơtàu ndrờm geh 8 cờn. Đơs tàm dơ̆ bơyai lơh, Tổng Ƀí thư ồng Tô Lâm jờng rơ broă lơh geh pal pơniờ să ngan bơh Hìu sơnơm Dà lơgar Mpồl ling klàng 108 dê, tàm sùm 75 nam ală broă bơ̆t bơtàu mờ dờng kràñ mpồl cau lơh sơnơm Hìu sơnơm dê neh lơh geh cồng nha, niam lơngăp lơngai ală măy mŏk kal ke, ờ ƀươn soh, dong kis geh uă cau kòp, geh uă măy mŏk lơh geh bồ tơnggoh jak kơnhoàl ù tiah mờ ală lơgar.

Tổng Ƀí thư kung sồr hìu sơnơm, sùm gàr kơ̆ mờ tơngguh uă tơl làm bơta niam broă lơh ờs mờng bè tơl ală bơta; pơgồp bal niam đah sơm mờ kơlôi sơnơng jak chài; sơlơ lơh broă bal ală lơgar tàm bơto mpồl cau lơh broă niam uă nàng kờñ gĭt wă bơta jak chài lơh sơnơm rài pa dê, ai rài lơh sơnơm dà lơgar he dê bơtàu tơngguh uă rlau tai.