Tổng Ƀí thư ồng Tô Lâm pà gĭt, pơgăp mờ do rlau 65 nam, ngai 28/11/1959, Củ tịc Hồ Chí Minh cih jơnau “Sa tềp tam chi”, pơn đàng tàm Ƀăo Làng bol, hòi jà tơl nă cau, tơl hìu bơnhă, tơl mpồl cau, ală tiah jơh nùs bal tàm pơrlòng tam chi, sơng ka sền gàr tờm chi mờ mblàng gơtha dờng màng mờ bơta kwơ geh ngan bơh broă tam tờm chi, lơh gơlik brê. Tổng Ƀí thư đơs nền, tus tŭ do, pah dơ̆ nam pa rê, “Sa tềp tam chi” neh ngan ngồn gơ gơs ngai chờ bơh jơh gùt Đảng, jơh gùt làng bol mờ jơh gùt ling klàng he dê. Do ờ mìng là dùl broă lơh geh gơtha bơhiàn yau jrô ơnàng lơm, mờ gam là broă lơh geh ngan, ngan ngồn nàng lơh broă lơh jat jơnau hơ pràn ngan bơh lơgar Việt Nam dê tềng đap mpồl bơtiàn Ală lơgar mờ lam lơh broă lơh kwơ màng Dà lơgar bè tam gơl nhơm trồ tiah, wèt tus dùl plai ù tơlir, tài bơta bơtàu tơnguh mhar mờ kơ̆ kơl jăp bơh Dà lơgar dê.

Di dơ̆ do, Tổng Ƀí thư sồr, ală Ƀộ, gah broă, is ồn  là Ƀộ Phan kwơ geh is mờ Tiah ơm kis, Ƀộ Broă lơh sa suơn sre mờ Bơtàu tơnguh Ƀòn lơgar pal pơgồp bal, lơh pràn broă lơh jat sền, sồr lơh ală tiah in lơh jat geh cồng nha srơh tam chi.