Wèt tus tơnkah 100 nam ngai crơng gơs Đảng Kộng sản Việt Nam (3/2/1930-3/2/2030), dim òr (15/01), tàm Hà Nội, Cơl dŭ lơh broă Đảng Dà lơgar bơyai lơh sơnđờm mŭt lơh Rơndăp broă lơh niam wơl, lơh ơnàng mờ lơh pa Tiah Hìu năc ơm Hồ Tây, do là broă sơn đờm lơh nàng pơn jăt tai lơh ală rơndăp broă lơh Bảo tàng Đảng Kộng sản Việt Nam mờ Rơndăp broă Tam gơl sồ tàm ală anih lơh broă đảng.

Tàm dơ̆ sơn đờm mŭt lơh, Tổng Ƀí thư ồng Tô Lâm bal mờ ală kwang bàng đơng lam Đảng, Dà lơgar mờ ƀòn dờng Hà Nội neh lam mŭt lơh Rơndăp broă do. Rơndăp broă Lơh niam wơl mờ lơh pa Tiah Hìu năc ơm Hồ Tây geh mŭt lơh, lơh tơnơ̆ mờ tŭ lơh gơs rơ̆p gơs anih bơyai lơh broă lơh, broă lơh cíñ trị tàm dơlam lơgar, broă lơh bal mờ lơgar ndai, ală broă lơh kwơ màng bơh Đảng, Dà lơgar; bơyai lơh pơrjum dờng cau ala măt gùt lơgar bơh Đảng; bơyai lơh wă rò ală mpồl cau năc bơh ală lơgar dờng tus còp lơh broă mờ bơyai lơh ală broă lơh đơs crih tamya kwơ màng di tơnkah ală ngai kwơ màng dà lơgar dê. Do là broă lơh geh kwơ màng cíñ trị dờng màng wèt tus chờ gờm Pơrjum dờng Đảng gùt lơgar dơ̆ XIV, pơgồp bal tàm broă bơtàu tơnguh lơh sa, niam chài mpồl bơtiàn bơh Càr lơgar rơbô nam niam bơnĕ, geh uă rơlao tai rùp rài, bơta tơngŏ niam lơgar Việt Nam dê gơwèt mờ bơyô ală lơgar dê.