Tàm dơ̆ wă, Tổng Ƀí thư ồng Tô Lâm pin dờn dơ̆ lòt còp bơh Bơtau dê, mờ bơta lòt bal bơh uă kwang bàng kấp dờng, đơng lam bồ mpồl lơh sa kă bro, Hìu bơsram Đại họk, Viện Kơlôi sơnơng, rơ̆p lơh geh bơta gơn kơnờm pa, ai bơta gĭt gơ̆p lơh bơyô bal, lơh broă bal uă bơta đah Việt Nam mờ Bỉ gơ lòt mŭt jrô ơnàng làm uă, ngan ngồn, geh cồng nha, lơh geh bơta kwơ bơh làng bol 2 lơgar dê, tă pơgồp geh kơnòl tàm bơta ring lơngai, kơ̆ kơl jăp mờ bơtàu tơnguh kơ̆ kơl jăp tàm tiah do mờ tàm dunia.

Nàng drờm pal mờ bơta ƀuơn, bơta pràn mờ bơta gĭt gơ̆p cíñ trị niam bơnĕ, Tổng Ƀí thư đơs sùm 2 lơgar pal pơn jat tai lơh jrô ơnàng làm uă lơh broă bal tàm ală gah kă bro phan, bơcri priă, broă lơh sa suơn sre kơ̆ kơl jăp jŏ jòng, bơto bơtê mpồl lơh broă jak, niam chài, lòt nhơl, tìp mat lơh kwèng làng bol, mơkung chồl pràn rlau tai lơh broă bal ngan ngồn đah gah jak chài- măi mok, tam gơl pa bơceh lơh, ngan là tam pà bal broă lơh bơtàu tơnguh mpồl lơh sa kă bro bơh tàm Hìu bơsram Đại họk lơgar Bỉ dê, pơgồp bơnah dong Việt Nam lơh geh ală jơnau kờñ bơtàu tơnguh tus nam 2030 mờ 2045.