Tàm dơ̆ wă, Tổng Ƀí thư ồng Tô Lâm đơs sùm 2 lơgar tam pà bal uă nùs nhơm ndrờm bal tàm broă lơh kwơ màng bơtàu tơnguh Dà lơgar, ai tơlik jơnau kờñ bal gơ gơs Dà lơgar bơtàu tơnguh pa ngan tơnơ̆ 100 nam crơng gơs lơgar (gơwèt mờ Việt Nam là nam 2045, ai Ấn Độ là nam 2047), den tàng kờñ pal sơlơ tơnguh rlau tai lơh broă bal tàm ală gah broă, is ồn là sơlơ tơnguh tai bơta gĭt gơ̆p lơh sa, kă bro phan, bơcri priă ndrờm pal mờ bơta ƀuơn bơta pràn.

Tổng Ƀí thư ồng Tô Lâm jờng rơ uă ngan Tập đoàn Adani sền gròi mờ bơt bơtàu broă lơh kwơ màng bơcri priă jŏ tơngai tàm Việt Nam, bơh hơ̆ pơgồp bơnah sơlơ tơnguh tai lơh broă bal, tam klăc 2 rài lơh sa Việt Nam mờ Ấn Độ. Tổng Ƀí thư cih dờp ală jơnau sồr đơs bơh Tập đoàn dê, sồr Tập đoàn rcang lơh broă mờ ală Ƀộ, gah broă, ƀòn lơgar geh gơnăp gơnoar nàng kờñ cribơyai, lơh loh ală jơnau sồr, pơlam gùng dà lơh broă bal, bơh hơ̆ sơlơ tơnguh tai lam lơh mhar ală rơndăp broă lơh bơcri priă tàm Việt Nam.