Tổng Ƀí thư đơs niam ngan ală tă pơgồp bơh Kwang ătbồ Anih lơh broă ala măt dê tàm broă lơh geh gĭt gơ̆p Tam klăc lơh broă bal Jŏ jòng đah Việt Nam mờ Philippines; mơkung đơs sùm nam 2025 là tềl tơngkah kir sơnrai 10 nam lơh gĭt gơ̆p Tam klăc lơh broă bal Jŏ jòng đah 2 lơgar. Tổng Ƀí thư sồr 2 đah pơn jăt tai tơnguh tai lơh broă bal cíñ trị- cribơyai broă mờ lơgar ndai, sơlơ tàm pơgơl mpồl kwang bàng lòt còp bal mờ gơ̆p; pơnđơl ai priă geh bơh kă bro phan 2 gah gờñ geh 10 tơmàn dolar Mỹ. Bơdìh hơ̆ tai, 2 đah kờñ pal rề ơnàng lơh broă bal tàm ală broă lơngăp lơngai- sền gàr dà lơgar, niam chài, bơto bơtê, drơng wơl mờ tam gơl nhơm trồ tiah.

Tổng Ƀí thư ồng Tô Lâm đơs nền, Việt Nam rơ̆p jơh nùs kờñ lơgar Philippines dờp lơh geh cồng nha gơnoar broă Củ tịc Asean nam 2026 mơkung pơgồp bal niam mờ ală lơgar Asean ndai nàng kờñ lơh jăt niam gơnoar broă tờm bơh mpồl dê, bơ̆t bơtàu dùl Mpồl bơtiàn Asean tam klăc, kơnờm tàm bơta pràn is, mờ bơtàu tơngguh kơ̆ kơl jăp.