Tàm dơ̆ wă, Tổng Ƀí thư ồng Tô Lâm đơs nền broă lơgar Tây là lơgar tàm Mpồl tam klac câu Âu (EU) sơn rờp ngan gơ gơs là lơgar lơh broă bal jŏ jòng tơl làm bơh Việt Nam dê là cơng tàng loh làng ngan ai gŏ Việt Nam sền dờng màng mờ kơp kờñ lơh niam rlau tai bơta git gơp lơh bơyô, lơh broă bal tơl làm mờ lơgar Tây; sồr lơgar Tây – mờ gơnoar broă là lơgar geh jơng tờm ngan mờ geh jơnau đơs tàm EU, sơlơ chồl tơnguh rlau tai bơta git gơp đah Việt Nam mờ EU nàng kờñ tă pơgồp tàm ring lơngai, kơ̆ kơljap mờ bơtàu tơnguh bơh tiah do mờ ală lơgar dê.

Tổng Ƀí thư ồng Tô Lâm mờ Kwang atbồ anih lơh broă ala mat lơgar Tây ring bal pơn jat tai sơlơ tơnguh lơh broă bal tàm ală dơ̆ cribơyai uă lơgar mờ mpồl lơh broă ală lơgar, chồl tơnguh rài lơh broă uă lơgar, lài ngan ki ngàm adat boh lam ală lơgar, bơsong ală bơta lòng gùt plai ù. Bè bơta tàm dà lềng đah mat tơngai lik, Kwang atbồ anih lơh broă ala mat lơgar Tây đơs nền, Tây mờ EU kờñ nùs nhơm bơh Việt Nam dê mờ ASEAN dê bè broă bơsong ală tam pìt tam phà mờ ală broă lơh ring lơngai bơh bơta lơh jat adat boh lam ală lơgar, pơgồp bơnah gàr sùm ring lơngai, kơ̆ kơljap, lơngap lơngai, khat gơboh gùng rơndeh par mờ gùng dà lềng tàm tiah do.