Tàm dơ̆ wă, Tổng Ƀí thư ồng Tô Lâm đơs ngan, Việt Nam kơp kờñ lơh niam lơh broă bal tơl bơta mờ lơgar Tây Ban Nha, dùl lơgar geh jơng kuơmàng mờ mpồng mut bơh Mpồl tam klac câu Âu dê; đơs nền jơnau gơtha bơh dơ̆ lòt còp lơgar Việt Nam dơ̆ sơn rờp bơh kwang atbồ Cíñ phủ Tây Ban Nha dê kờp bơh tŭ 2 lơgar lơh bơta git gơp cribơyai broă mờ lơgar ndai mờ pin dờn, dơ̆ lòt còp rơp lơh gơlik bơta pràn ai git gơp “Lơh broă bal kuơmàng wèt tus tơnơ̆ do” đah Việt Nam mờ Tây Ban Nha guh tus bơta pa, tài bơta bơtàu tơnguh mờ bơta kuơ bơh làng bol 2 lơgar dê, tài ring lơngai, lơh broă bal mờ bơtàu tơnguh tàm tiah do mờ tàm dunia. Bàr gah ring bal sơlơ tơnguh lơh broă bal tàm ală gah sền gàr dà lơgar – lơngap lơngai, lơh broă suơn sre, bơto bơtê mờ bơsram, mờ kung rề ơnàng lơh broă bal tus ală broă geh bơta pràn bè tam gơl pa bơceh lơh, bồ tơngoh jak kòn bơnus lơh gơs, ƀán zẫn, tam gơl sồ.