Ala măt ală oh mi kwang đơng lam bồ Đảng, Dà lơgar ki ngàm jàu Gai lòng Lơh broă khà Dùl ai Đảng ƀộ, gơnoar ătbồ mờ làng bol ƀòn drà dờng Phước Long in, Tổng Ƀí thư ồng Tô Lâm tơlik nùs nhơm kah rơngal uă ngan dà kơlhề ală Cau khin cha jak chài Chơ̆t màng, làng bol, oh mi neh khin cha jak chài tam lơh, phi să ai bă ù “Tiah đah măt tơngai Lik bòl glar kal ke ngan mơya Khin cha jak chài”, ai broă lơh tơngklàs mờ tơrgùm dùl dà lơgar in. Tổng Ƀí thư jờng rơ mờ đơs niam ngan ală broă mờ càr Bình Phước lơh geh tàm mờr 50 nam tơngklàs. Bơh dùl ƀòn lơgar geh phan bơna rƀah lơ ời ngan, broă lơh sa dềt, rài kis làng bol dê kal ke, Bình Phước neh mờ gam tam gơl pah ngai nàng gơgơs “gơn kơnờm bơtàu tơngguh” bơh jơh gùt kơnhoàl ù tiah do dê.

Tổng Ƀí thư sồr càr pơn jăt tai đòm jăt pràn kơldang bơta kơ̆ nùs, bồ tơnggoh jak, bơta kơ̆p kờñ, nùs nhơm mờ bơta pràn bơh mpồl tam klăc dờng jơh gùt bơtiàn dê nàng lơh geh bơta ƀươn, hòi tơrgùm mờ ngui geh cồng nha jơha lă bơta pràn tàm mpồl bơtiàn; lơh pràn lơh sa mờ măy mŏk lơm, tam gơl sồ nàng bơtàu tơngguh mpồl lơh sa pa; sơlơ tàm tơrbŏ tiah bơh bơtàu tơngguh ală phan bơna gùng lòt tờm kwơmàng; lơh geh uă broă mờ tơngguh rề dia; tơngguh uă bơta niam rài kis ai làng bol in.