Tàm ƀòn Trấp, sàh Cư Mgar, ală gơl gùng dềt hàng bơnĕ ghe gòm tơlir bơh ală chi che, ală àr bơkàu gam lì tơnggŏ rùp să hàng bơnĕ ngan tàng trồ tơngai àng gơcrà. Is ồn rlau tai là rùp hiñ ală nha bồng bi pơrhê sơrmañ rơmĭt par lĭp lơ̆p tàm càl, sơng pơrhê ai ƀòn lơgar in, cèng bềng bơta pơñiờ să jơi bơtiàn. H’Hằng Êban, dồ nă bơyô kơnòm să ƀòn Trấp dê yal: “Geh jàu kơnòl broă yồng bồng bi tàm gơl gùng ƀòn dê, añ gŏ gơlơh pơñiờ să ngan. Broă yồng bồng bi dong añ gĭt wă rlau tai bơhiàn kăc màng bơh jơi bơtiàn dê, bè jơnau kah yau Đảng dê mờ sơlơ gơboh kờñ rlau tai ƀòn tờm he dê”.

Gơl gùng bồng bi ƀòn Trấp dê jòng 1 kơi sồ, sơnđờm bơh ngai chờ Tam klăc dờng, tơnơ̆ hơ̆ pơn jăt tai lam lơh di dơ̆ Pơrjum dờng Đảng, Lam bồ ƀòn Trấp là ồng Y Suinh Buôn Yă, yal: “Tŭ lam lơh broă yồng bồng bi, làng bol cau lơi kung chờ hờp lơm. Tơl hìu blơi is bồng bi, yồng is. Bồng bi Đảng den hìu lơi là đảng viên den rơ̆p yồng, ai bồng bi Dà lơgar den hìu lơi kung yồng lơm, nàng jờng rơ dà lơgar”.

Bơh ƀòn Trấp, broă lơh tơrlòng lài gùng bồng bi Dà lơgar neh gơrề uă pràn kơldang. Sàh Cư Mgar tŭ do geh 7 kơi sồ gùng bồng bi, geh ală gơl gùng tờm mờ jơh 11 thôn, ƀòn. Mò Hồ Thị Thanh Hải, Phó Ƀí thư duh broă sùm sàh Cư Mgar, yal: “Tŭ do jơh 11 thôn ƀòn ndrờm lơh niam wơl, lơh bơka gơl gùng bồng bi he dê mờ yồng ală nha bồng bi Dà lơgar, bồng bi Đảng gơ là pa ngan tàm gơl gùng. Tŭ he lòt tàm ală gơl gùng bồng bi ƀòn dê den nùs nhơm gơlơh chờ hờp ngan, brơn brài ngan hơ̆ là kung là dùl tàm ală srơh bơ̆t bơtàu mpồl tam klăc dờng gùt jơi bơtiàn kung bè sền gàr Dà lơgar”.

Tàm thôn Tiến Thịnh, sàh Quảng Tiến, kơnhoàl Cư Mgar, tơl hìu bơnhă ndrờm ki ngàm yồng bồng bi tềng đăp mpồng hìu tàm ală dơ̆ lơh chờ, is ồn là tàm ală ngai Sa tềp Bơhiàn jơi bơtiàn dê mờ ngai tơnggơs Đảng. Bal mờ mờr 400 hìu bơnhă, thôn Tiến Thịnh là dùl tàm ală tiah bơh sơnrờp lơh jăt broă lơh tơrlòng lài gùng bồng bi lơh krơh lài. Ồng Nguyễn Tấn Chờ, lam bồ thôn Tiến Thịnh, pà gĭt: “Tŭ dồ thôn ƀòn geh dồ nơm gùng bồng bi den hơ̆ là bơta pơñiờ să bơh ƀòn lơgar dê. Gùng bồng bi thôn Tiến Thịnh là thôn sơnrờp lơh gùng bồng bi, là gùng lơh krơh lài bơh kơnhoàl dê. He ki ngàm nha bồng bi kung bè he ki ngàm Dà lơgar, den he yồng nha bồng bi bơh nùs nhơm sền dờng màng ngan”.

Broă lơh tơrlòng lài gùng bồng bi do tàm thôn Tiến Thịnh, sàh Quảng Tiến lam lơh bơh nam 2016, tơnơ̆ hơ̆ neh mhar rề ơnàng lơh uă tus 6 thôn tàm sàh. Mò Nguyễn Thị Thanh Vân, Phó Củ tịc anih duh broă Làng bol sàh Quảng Tiến, yal: “Lài do, tơl nă làng bol khi yồng jăt bơta geh khi dê, tơnơ̆ hơ̆ sàh neh lam lơh dồ ròt tàm jơh 6 thôn lơh jăt gùng bồng bi, tus tŭ do ală thôn ndrờm lơh jăt gùng bồng bi mờ làng bol kung dồ nùs bal lơh jăt jơh nùs ngan”.

Gùng bồng bi Dà lơgar tàm kơnhoàl Cư Mgar neh pơgồp bơnah lơh kah wơl bơta pơñiờ să jơi bơtiàn dê, chồl tơngguh nùs nhơm tàm pơrlòng bơtàu tơngguh lơh sa, niam chài tàm kơnhoàl. Ồng Nguyễn Thiên, Phó Ƀí thư duh broă sùm Huyện ủy kơnhoàl Cư Mgar, pà gĭt: “Ală sàh, ƀòn drà dềt lơh gùng bồng bi bơh nam 2020. Bơh chờm mìng lơh tàm gơl gùng tờm tàm tiah tờm sàh dê, tŭ do bàr pe sàh, ƀòn drà dềt neh rề ơnàng lơh gùng bồng bi tàm ală gơl gùng tàm thôn, ƀòn, mpồl làng bol tiah drà. Lơh gùng bồng bi là nàng yal tơnggĭt mblàng yal ai Pơrjum dờng Đảng ală kâp in mơkung là nàng ƀươn ƀoài rlau tàm broă lơh yal tơnggĭt mblàng yal di ală dơ̆ chờ tơngkah kir sơnrai dà lơgar dê”.

Ală gơl gùng bềng rùp să bồng bi pơrhê sơrmañ rơmĭt par lĭp lơ̆p tàm càl kàl prang bồ nam pa là cơng tàng tơnggŏ ngan ngồn ai ală cồng nha tàm broă lơh bơ̆t bơtàu ƀòn lơgar pa tàm Cư Mgar, càr Dăk Lăk ngai sơlơ pas niam, jak chài.