Tàm ƀòn dờng Hồ Chí Minh, Tổng Ƀí thư Mpồl Duh broă Đảng Kộng sản Dà lơgar Việt Nam ồng Tô Lâm neh geh Dơ̆ tam tìp kâp dờng mờ Củ tịc Đảng Làng bol Campuchia, Củ tịc Thượng viện lơgar Bơtau Campuchia ồng Hun Sen mờ Tổng Ƀí thư Đảng Làng bol Kăc màng Lào, Củ tịc lơgar Kộng hoà Làng bol lơh tờm Làng bol Lào ồng Thongloun Sisoulith.

Tàm dơ̆ tìp, tàm tŭ broă tàm kơnhoàl ù tiah do mờ tàm dunia uă bơta gơ tam gơl, kal ke gơtùi gĭt nền, pe đah dồ nùs ring bal pơn jăt tai lơh jrô ơnàng, tơl làm mờ rề ơnàng rlau tai gĭt gơ̆p đah pe Đảng, pe lơgar, lơh kơ̆ kơl jăp pin dờn cíñ trị mờ gĭt gơ̆p đah ală oh mi Đơng lam bồ kâp dờng; hơ pơrgon gàr sùm mờ đòm jăt bơhiàn tam klăc đềt mềr đah pe lơgar, sền do là jơtài ndờng màng ngan, là jơnau pal jăt dipal ờ gơtùi pleh klàs bal mờ broă gàr niam tiah ơm kis ring lơngai, lơngăp lơngai mờ bơtàu tơngguh tơl lơgar dê; dồ nùs ring bal gàr sùm mờ tơngguh rlau tai broă lơh mblàng yal, bơto bơtê nàng ală rơnàng làng bol pe lơgar in, ngan là rơnàng kơnòm să, gĭt wă loh mờ sùm prăp kah bơhiàn tam klăc đềt mềr do. Pe nă Đơng lam bồ dồ nùs bal lơh jăt geh cồng nha mpồl lơh broă, gùng dà lơh broă bal gam geh tŭ do, pơn jăt tai tàm cribơyai, jòi gùng dà broă lơh pa nàng lơh broă bal ngai sơlơ niam, geh cồng nha, ngan ngồn, tài bơta kwơ tơl lơgar dê mờ bơta kwơ bal bơh làng bol pe lơgar dê, tài ring lơngai, kơ̆ kơl jăp, lơh broă bal mờ bơtàu tơngguh tàm kơnhoàl ù tiah do mờ tàm dunia.