Pơrjum cribơyai đơs nền, biăp plai chi là dùl tàm pe mpồl gah phan lơh geh bơh sươn sre tăc mờ lơgar ndai uă ngan rlau jơh bơh lơgar Việt Nam dê. Nam 2024, kờp jơh priă geh bơh tăc mờ lơgar ndai biăp plai chi lơh geh khà uă ngan rlau jơh bơh lài tus tŭ do là 7 tơmàn 120 tơlak dolar Mỹ. Bulah neh tăc tus rlau 80 dà lơgar mờ kơnhoàl ù tiah ală lơgar mơya biăp plai chi Việt Nam kung gam pal kong sơl mờ ală bơta kơryan bơta chài ngai sơlơ kal ke ngan bè jơngkah sơnơm sền gàr phan tam, sền swì kòp bơtờp mờ jơnau sồr bè ală jơnau sồr lơh broă, tiah ơm kis.

Tàm pơrjum cribơyai, ală cau gĭt wă jrô, cau ătbồ, mpồl lơh broă sa kă bro…yal bè bơta geh ngan, bơta lòng mờ ală broă lơh bơsong bơtàu tơngguh tăc mờ lơgar ndai biăp plai chi Việt Nam; gơnoar broă bơh lơh broă bal đah dà lơgar mờ làng bol dê tàm tơngguh uă bơta niam biăp plai chi tăc mờ lơgar ndai; tam pà ală măy mŏk tàm lơh gơlik biăp plai chi…