Lồi nhai 3 nam 1975, tŭ nùs nhơm rcang lài tàm ală tiah tam lơh đah Jum Dà lơgar tam gơl sơr băc mhar, Đại tướng ƀồc ồng Võ Nguyên Giáp neh đơng lam Gah kwang đơng lam Ling tiah 5 mờ Gah kwang đơng lam Ling dà lềng mhar tơngklàs bồt dờng Trường Sa. Tơnơ̆ hơ̆ tơn, dùl mpồl ling lơh jat kơnòl broă is ồn geh tơnggơs, geh mpồl ling Lữ đoàn 126 Ling tam lơh Ling dà lềng pơgồp bal mờ ling tam lơh hơđang ù gờl, yal tơngĭt jơnau, ală mpồl ling dong kờl gơwèt Ling tiah 5.

Nàng gàr niam bơta ndơ̆p ndơr, nisơna, ală ơhò jun pơndiang mpồl ling klàng dê bơka gơ gơs ơhò tras ka lơgar ndai dê. Mpồl ling mpồn să tàm ală tiah tàm dơlam ơhò, tiah ơn phan bơna, jơh nùs lòt ling tàm ală bơta nsừc dà lềng dờng mờ bềng bơta ngòt rơngơ̆t. Mho ngai 13/4/1975, ală ơhò bơh he dê neh tus mờ bồt Song Tử Tây. Drim gờñ ngai tơnơ̆, mpồl ling tam lơh tàm dà, mpồl ling tàm lơh tềng hơ đang ù gờl rah phào, pờ dơ̆ sơnđờm sò tơm sơr băc mhar tàm bồt. Bulah gơtìp bơta dră wơl kràñ cê jơh nùs ngan mơya kơnờm bơta tơrgùm dùl nùs bal kơ̆ ngan, bơta nisơna, mìng tơnơ̆ 30 phuk tam lơh, ling tơngklàs neh lơh tờm bồc Song Tử Tây. Hơ̆ là dơ̆ cuh phàu sơnđờm pờ dơ̆ tam lơh tơngklàs jơh bồt dờng Trường Sa dê.

Ồng Trần Đăng Ninh, 70 sơnam, ƀòn tờm ơm tàm Hải Hậu, Nam Định, cau ling yau ling tam lơh tus bal tam dơ̆ tam lơh ngoh rơngăc kah wơl:“Dơ̆ tam lơh do là ndơ̆p ndơr ngan, nisơna tus rềp tàm bồt, đah ling Sài Gòn ờ kơlôi là bol he neh tus mhar ngan bè hơ̆. Tŭ hơ̆, ală bơta tềng hơ đang ù gờl gam uă bơta ờ niam, tàm dà lềng uă ơhò bol sò tơm dê lơh broă, geh tŭ geh bal bơta sền gròi bơh ală bol gơ jràñ gơ uềng đah bơdìh tai. Tơnơ̆ ngai 14/04, jàu mpồl ling tam lơh bol añ in ơm wơl sền gàr bồt, ai mpồl gam wơl pơndiang cau ling sồt să,  ling jàm bol sò tơm rê tàm Đà Nẵng”. .

Tàm pơn jat tai tam lơh jai pha, ngai 21/4/1975, mpồl ơhò dơ̆ 2 pơn jat tai sơr lèt gan kal ke lòt tàm dà lềng, tus rềp mờ dơ̆ dùl dơ̆ tơngklàs ală bồt Sinh Tồn, Nam Yết, Trường Sa, Sơn Ca… Ngai 29/4/1975, ală bồt gơwèt bồt dờng Trường Sa neh geh tơngklàs. Trung úy ồng Nguyễn Văn Mỹ, cau ling yau gơwèt Sư đoàn 2 gơwèt Lữ đoàn 126 yal wơl, mho ngai 30/04, tơl nă cau ling iăt jơnau yal tơngklàs Sài Gòn bơh jơnau yal tơngĭt is ồn bơh Anih Jơnau đơs Việt Nam dê, ngoh rơngăc ờ gơtùi đơs ngan:“Tŭ hơ̆, bol añ gam ơm tàm bồt Song Tử Tây, tàm yal tơngĭt bal kal ke ngan. Tŭ Anih jơnau đơs Việt Nam yal neh tơngklàs jơh tiah đah Jum Dà lơgar, yồng bồng bi tàm gơlăng Độc Lập, oh mi brơn brài ngan, tàp tê, chờ hờp ngan. Tŭ gĭt neh tơngklàs, bol añ cau gam kis kah kơlôi pơlai soh ngan ai cau ling bal neh chơ̆t phi să lài tŭ jiơ ring lơngai dê”.

Tơnơ̆ 50 nam geh tơngklàs, kơnhoàl bồt Trường Sa tŭ do gam brồ să pràn kơl dang tàm nùs nhơm rcang lài Dà lơgar dê bè lơh sa dà lềng, là “plai nùs” tàm gùl dà lềng đah mat tơngai lik, pơgồp bơnah tơnguh gơnoar broă Dà lơgar dê tàm sră wăc sềr rùp dà lềng bồt bơlào ală lơgar. Ồng Nguyễn Tấn Tuân, Củ tịc Anih duh broă Làng bol càr Khánh Hoà pà gĭt, tàm tơngai tus, càr pơn jat tai lơh sir ală broă lơh cíñ trị, tơnguh uă bơta niam rài kis ai ling klàng mờ làng bol ală bồt in; lơh pràn mblàng yal, yờ tơnguh uă bơta gĭt wă bè Trường Sa tàm mpồl bơtiàn. Ồng Nguyễn Tấn Tuân đơs nền, jơnau kờñ là ai Trường Sa gơ gơs anih tờm lơh sa- mpồl bơtiàn tàm tơngai pa tàm dà lềng đah mat tơngai lik, mơkung là, anih kơ̆ kơl jăp sền gàr gơnoar tờm ù tiah Dà lơgar dê:“Gàr niam ngan, dùl bơta là ală gùng dà broă lơh dong kờl, bơta ndai tai là pal lơh geh priă jền ai làng bol in. Ală hìu bơnhă tus bal lơh broă lơh sa jài mơkung tus bal sền gàr gơnoar tờm dà lềng, bồt bơlào. Ling dà lềng, càr Khánh Hoà sền gròi bal ai kơnhoàl bồt in. Hơ̆ là bơta pơndờm pơnđiang dờng, nàng tơl nă làng bol tềng hơđang ù gờl kung bè bơdìh bồt in gŏ là dờng mang ngan rlau jơh là gơnoar tờm, lơngăp lơngai is bơh Dà lơgar dê".