Ồng sồr ală Bộ, gah lơh broă dà lơgar, ală càr, ƀòn dờng lơh jăt nền nòn tai “pe tam gơl dờng”, gơdờp mờ bơta niam chài xã hội chủ nghĩa Việt Nam tàm tơngai pa. Hơ̆ là: tam gơl bơh bồ tơngoh sền bơta niam chài là dùl gah broă bơtàu tơnguh tus mờ broă lơh bơta niam chài là tơngu me tờm nùs nhơm bơh mpồl bơtiàn dê; tam gơl bơh bơta niam chài ờs mờng tus mờ broă bơtàu tơnguh bơta niam chài tàm jơh bơta mùl màl mờ tàm măi mok sồ; tam gơl bơh bồ tơngoh prăp gàr là tờm tus mờ broă pơgồp bal nền nòn đah prăp gàr mờ bơceh lơh.

Ồng Tô Lâm, Tổng Bí thư, Chủ tịc lơgar đơs loh: Lơh pràn bơ̆t bơtàu gơnoar tờm niam chài tàm măi mok sồ tơnguh uă bơta niam, bơta pràn lơh geh uă mờ sền gàr ală bơta kwơ niam chài lơgar Việt Nam dê. Tàm măi mok sồ, broă gơrềng bal, rơwah niam chài là bơta pal geh, ai tơl bơta niam nàng lơgar Việt Nam dờp bơta niam chài kòn bơnus dê, mơya kung ai geh jơnau kờñ jal mhar pal tơnguh bơta pràn lơh tờm, bơta pràn ai geh gùng dà broă lơh bal mờ bơta pràn sơndră bơh bơta niam chài jơi bơtiàn dê.