Broă jê nùs gơlik geh lơh 5 nă kơnòm bơsram rơcang mut ơdŭ 6 chơt să tŭ ală oh tàm jà gơp lòt nhơl tàm tơnau bơtơt rbòng dà Dăk Pot mờ ờ bơtuah ntiar jơng gơdùh tàm tiah dà jrô. Rềs àr nđàc sơng gitt ngan gơlik geh tàm tŭ kơnòm bơsram mut tàm tơngai rlô bơkang, pơgồp bal mờ trồ tiah mìu lơh dà tàm ală dà dờng, dà croh, tơnau dà mờ broă lơh bơtơt rbòng dà gơguh tih, hòr ñhăng sơbơng roh ngan. Bơta geh ngan do ai gŏ bơta ha pah dờng ngan tàm broă atbồ, jat sền kơnòm dềt bơh hìu bơnhă mờ mpồl bơtiàn dê tàm ală nhai kơnòm bơsram ơm rlô bơsram.

Tềng đap bơta jal mhar do, ngai 09/7, Anih duh broă Làng bol càr Lâm Đồng neh ai lơh jat sră nggal sồr lơh jal mhar, sồr jơh gùt anih lơh broă chính trị lơh broă bal nàng kờñ tơrmù ƀà ală broă ndrờm bè do. Jat hơ̆, Gah bơto bơsram geh sồr sơlơ tàm pơgồp bal mờ hìu bơnhă nàng atbồ kơnòm bơsram tàm kàl rlô bơkang, lơh pràn broă bơto re dà lơngăp lơngai. Gah Niam chài, Tàp pràn să jan sơlơ sŏk sền bơta lơngăp lơngai tàm ală sơntèk re dà, tiah nhơl ñŏ; gah Lơh sơnơm sơlơ tơnguh pràn jak sơm jal mhar lài tàm kâp hơ đơm. Bal mờ hơ̆, ală mpồl lơh broă geh gơnoar kong kơnòl sền wơl jơh ală tơnau dà, broă lơh bơtơt rbòng dà nàng mhar crăp lơh pơng gàr bơkang, tồt ƀàng tơngkah lài sơbơng roh.

Is ồn, Anih duh broă Làng bol càr Lâm Đồng đơs sùm, Chủ tịch Anih duh broă Làng bol ală sàh, sơnah ƀòn pal kong kơnòl tơl làm mờ kong kơnòl nă să is tềng đap Chủ tịch càr dilah lời gơlik geh broă kơnòm dềt chơt să tài bŭ dà gơ wèt ù tiah mờ he atbồ.

Sồr lơh kràñ cê bơh gơnoar atbồ neh geh, mơya nàng ờ gam tai ală dà mat wờl să, tơl hìu bơnhă kờñ tơnguh jơnau git wă rơcang ngac lài. Lời tĕ tŭ tơngai nàng sền gròi, sền gàr, pơlam bơta chài kis jŏ kơnòm dềt in, bañ lời ală oh lòt is um dà dờng, tơnau dà mờ ờ geh cau dờng jat sền. Sền gàr kơnòm dềt tềng đap rềs àr bŭ dà kàl rlô bơkang ờ mìng là kơnòl bơh dùl nă cau lơi dê lơm.