Broă ai lòt rê gùng trồm jòng ngan rơlao jơh gơl gùng rơndeh lòt mhar tơrbŏ brê bơnơm mờ dà lềng, lơh geh bơnàng jă kwơ màng nàng ai lòt rê jơh gơl gùng tàm lồi nam 2026 mờ ai broă lơh mut ai ngui bồ nam 2027. Gùng trồm koèl kơh Phượng Hoàng, đah 2 càr Dăk Lăk mờ Khánh Hoà, jòng 1 kơi sồ 700 thơ̆k, gơwèt bơnah broă XL01, Rơndăp broă lơh bơnah 2, bơh Mpồl atbồ rơndăp broă lơh 6 (Ƀộ Bơt bơtàu) lơh anih tờm bơcri priă lơh.

Sơn đờm mut lơh nhai 4 nam 2024, mờr 600 nă kwang bàng, cau chài lơh, cau lơh broă bal mờ pơgăp 180 phan bơna măi mok ờs ngui neh lơh broă sùm, tơrbŏ gùng trồm đah ma tàm nhai 10 nam lài, mờ lồi nhai 12 pa do tơrbŏ gùng trồm đah kiao. Bơnah broă XL01 gơwèt Rơndăp broă lơh bơnah 2 gùng rơndeh lòt mhar Khánh Hòa – Buôn Ma Thuột geh bơta jòng 11 kơi sồ. Bal mờ ală gùng trồm Phượng Hoàng, bơnah do gam geh 10 nơm rơbàng mờ uă gơl gùng. Tŭ do mpồl khà broă lơh jơh ală bơta neh lơh geh mờr 90%.