Pa do, càr Dăk Lăk bơyai lơh Pơrjum tơrbŏ bal dơ̆ (tour) mờ bơtàu tơnguh anih tus lòt nhơl nàng sền bơta pràn, bơta kwơ mờ bơta mùl màl bơh gah lòt nhơl càr dê; mờ ai geh dơ̆ pơrjum nàng ală cau jăk, cau atbồ mờ mpồl lơh sa kă bro geh cri bơyai, ai geh gùng dà broă lơh nàng bơtàu tơnguh lòt nhơl kơl jăp, tơnguh uă bơta pràn tàm pơrlòng, pơgồp bal tàm broă lơh jăt jơnau kờñ gơguh lơh sa bàr sồ tơngai bơh nam 2026 tus 2030.

Tàm pơrjum, uă cau jăk mờ mpồl lơh sa kă bro đơs là broă tơrgùm bal ù tiah nàng bơtàu tơnguh đah Tây Nguyên mờ jăt gah dà lềng neh pờ geh dơ̆ niam uă ngan ai gah lòt nhơl càr Dăk Lăk in. Bơh dùl anih tus pơnrơ ngan mờ kơphe, niam chài cing mồng, ƀòn lơgar, tơnao dà Lăk, Buôn Đôn mờ bơta niam brê bơnơm krơi is, càr Dăk Lăk tŭ do gam geh bơtơl ală bơta pràn pa bơh dà lềng, pòt dà lềng, tiah lŭ bal mờ ală bơta kwơ niam chài mờ phan sa jăt gah dà lềng dê.

Broă tơrbŏ bal đah dà lềng mờ brê bơnơm dờng geh sền là gùng lòt geh uă bơta pràn nàng lơh gơs ală phan lòt nhơl pơgồp bal tiah krơi is, tơnjŏ tơngai ơm mờ tơnguh broă nhơl sền ai cau năc in. Mơya, jăt ală cau jăk đơs, bơta kwơ mìng mùl màl geh gơguh cồng nha tŭ geh tam gơl gơs ală phan lòt nhơl niam, geh nùs nhơm tàm pơrlòng uă. Ồng Nguyễn Hữu Y Yên, Chủ tịch Mpồl duh broă Công ty Kong kơnòl nă să is Drơng broă sa priă Lòt nhơl Saigontourist đơs là: “Tơnơ̆ mờ tŭ gùng rơndeh lòt mhar tơrbŏ ƀòn dờng Hồ Chí Minh tus Tuy Hoà tơrmù gam 7 jơ lòt. Lơh bè lơi nàng Tuy Hoà geh ală broă lơh niam ngan, bơnĕ ngan. Mình ờ kờp broă um dà lềng bè tŭ do den he pal bơcri priă tai ală tiah nhơl pơ-rài bồ tơngoh dờng, ndrờm bal mờ ală tiah ndai den hơ̆ sồng cau năc tus mờ Tuy Hoà”.

Bơdìh mờ ală bơta kwơ pa, ală cau ala măt kung ai tơngŏ uă bơta gơkòl gam lơh kal ke tus mờ broă bơtàu tơnguh bơh gah lòt nhơl bè phan bơna gùng lòt ờ hềt ndrờm bal, bơta niam broă lơh drơng ala ờ hềt di pal mờ bơta geh, broă hòi jà yal gam ờ pràn mờ broă ngui măi mok sồ ờ hềt di pal mờ jơnau kờñ bơtàu tơnguh tàm bơta pa. Geh uă jơnau đơs nàng càr pal geh kơrnoăt krơi is nàng hòi jà bơcri priă tàm phan bơna lòt nhơl, dong kờl mpồl lơh sa kă bro lơh geh phan pa mờ rề ơnàng ală gùng lòt, dơ̆ lòt pơgồp bal.

Tàm rài bơtàu tơnguh lòt nhơl tơlir, ngăc ngar mờ kơl jăp, càr Dăk Lăk geh kơ̆p gơn rơ̆p ngui geh cồng nha bơta ơnàng bơtàu tơnguh pa nàng lơh gơs ală phan geh uă bơta niam chài krơi is, pơgồp bal tàm broă tơnguh uă bơngă anih tus tàm pang sră rùp lòt nhơl dà lơgar dê. Iăt ală jơnau đơs pơgồp bal tàm pơrjum, ồng Đào Mỹ, Phó Chủ tịch Anih duh broă Làng bol càr Dăk Lăk pà git, càr rơ̆p tơrgùm lơh ală gùng dà broă lơh tờm nàng dong kờl mpồl lơh sa kă bro mờ bơtàu tơnguh anih tus. “Lơh geh sră wăc rùp anih tus bơh lòt nhơl dê là lài ngan. Dơ̆ bàr tai là geh broă dong kờl pờ geh dơ̆, nàng lơh geh anih tus. Lơh geh bè hơ̆ den mpồl lơh sa kă bro hơ̆ sồng iang nùs pin dờn tàm broă pờ geh dơ̆ lòt nhơl, lơh geh anih tus nàng hòi jà cau năc lòt nhơl”.

Ờ mìng ơm wơl tàm ală gùng dà broă lơh kwơ màng, pơrjum gam dờp geh ală broă lơh mùl màl nàng lơh pràn broă tơrbŏ bal bơtàu tơnguh lòt nhơl. Sờh Niam chài, Tàp pràn să jan mờ Lòt nhơl càr Dăk Lăk neh kĭ lơh broă bal mờ ờ uă mpồl lơh sa kă bro lòt nhơl; mờ ală mpồl lơh sa kă bro lòt nhơl, hìu ơm, tiah anih lòt nhơl, hìu sa mờ mpồl pơn diang kung kĭ hơ bal ală jơnau ring bal tơrbŏ bal, lơh tơmù priă bè priă lòt nhơl mờ tơnguh uă bơta niam broă lơh ndrơng ala nàng hòi jà lòt nhơl.

Broă tơrbŏ bal tiah kung gam geh uă tiah lơh pràn. Pa do, càr Lâm Đồng mờ Khánh Hoà kung neh bơyai lơh broă lơh tơrbŏ bal hòi jà bơcri priă, kă bro phan mờ lòt nhơl nam 2026, pờ ơnàng dơ̆ niam lơh broă bal đah Tây Nguyên mờ jăt gah dà lềng đah Jum tàm Gùl lơgar. Bàr càr neh kĭ hơ bal 8 pang sră lơh broă bal đah ală mpồl lơh sa kă bro nàng lơh pràn broă hòi jà bơcri priă, kă bro phan mờ lòt nhơl. Tàm tŭ càr Khánh Hoà là tiah tờm lơh sa dà lềng mờ mpồl phan bơnalòt nhơl bơtàu tơnguh, den càr Lâm Đồng geh bơta ƀuơn bè nhơm trồ tiah, lòt nhơl tiah niam brê bơnơm, ơm rơlô să mờ lơh broă sa suơn sre ngui măi mok pa. Broă tơrbŏ bal mờ ală gơl gùng lòt tờm bè gùng dà lơgar sồ 1, gùng rơndeh lòt mhar đah Tô – đah Jum, gùng 27C, gùng rơndeh ồs đah Tô – đah Jum bal mờ mpồl anih ơhò dà lềng ơm mờ ƀlàng rơndeh par gam lơh geh bơta ƀuơn nàng lơh gơs ală phan lòt nhơl in, pờ ơnàng tiah bơtàu tơnguh mờ hòi jà bơcri priă.

Bơh tàm brê bơnơm dờng tus mờ dà lềng tơlir, broă tơrbŏ bal đah ală càr Tây Nguyên mờ jăt gah dà lềng đah Jum tàm Gùl lơgar gam pờ geh bơta ơnàng bơtàu tơnguh pa ai lòt nhơl in. Tŭ geh ală bơta pràn is geh tơrbŏ bal gơs bơta pràn bal, do geh sền là bơta pràn kwơ màng ngan nàng tiah do geh gơguh pràn, pơgồp bal tàm broă brồ să bơh dà lơgar dê tàm rài pa.