Dờp phan pà satềp là 500 rơbô đong priă ngan bơh broă lơh Nam pa kờñ gơboh geh Mpồl Cữ thập đỏ càr Dăk Lăk pơgồp bal mờ ală mpồl lơh broă, mò H’ Wênh Byă, kis tàm ƀòn Kroa B, sàh Cuôr Dăng, kơnhoàl Cư Mgar chờ hờp đơs: “Añ rơ̆p ngui priă do nàng blơi phe sa, chờ hờp ngan, tài pah ngai lòt khòm khàr đù kung glar bòl ngan mờ jòi geh kung ờ geh uă priă sơl. Tŭ do geh sền gròi mờ pà phan den chờ hờp ngan, dong kờl geh bơnah lơi den tàng gơlơh chờ hờp ngan”.

Nàng di tŭ dong kờl, pơn dờm pơn iang cau rơƀah, hìu nhă geh rài kis gơtìp kal ke geh tơl phan nàng wă rò nam pa satềp tơl rơlao, Mpồl Cữ thập đỏ càr Dăk Lăk neh pơgồp bal mờ ală mpồl lơh broă dong kờl pà git nđờ rơhiang pò phan tàm ală tiah gơtìp kal ke, tiah làng bol jơi bơtiàn ờ gal cau. Bal mờ broă drơng gàr satềp, Mpồl kung pơgồp bal lơh ală broă lơh rài kis broă lơh broă sa mpồl bơtiàn bè: pơlam sơnka sền gàr bơta pràn kơl dang bơr sề, pà sră ƀảo hiểm lơh sơnơm, jào priă dong kờl bơsram mờ pà rơndeh coh ală kơnòm bơsram geh rài kis gơtìp kal ke bơsram jăk in…

Mờ ală mpồl lơh broă đoàn ơruh pơnu, mpồl cau ùr, mpồl cau lơh broă… kung bơyai lơh uă broă lơh drơng gàr satềp mờ làng bol tàm tiah kal ke, tiah nhàr lơgar. Mò Võ Thị Ngọc, Phó Củ tịc Mpồl tam klăc cau ùr càr Dăk Lăk yal: “Mờ Mpồl tam klăc cau ùr càr kung neh bơyai lơh pà phan ală cau gơtìp kal ke in mờ khà 500 tơlăk đong, bơyai lơh Satềp kờñ gơboh tàm kơnhoàl Krông Búk; mờ lơh broă bal mờ cau ùr tiah nhàr lơgar, bơyai lơh ală broă lơh gơwèt tus cau ùr mờ kơnòm dềt rơƀah tàm tiah nhàr lơgar tàm ală sàh Ia Lốp mờ Ea Bung. Tàm tơngai tus rơ̆p pơn jăt tai bơyai lơh ală broă lơh pơn jăt tai tàm ală tiah bal mờ ală tiah gơtìp kal ke”.

Tus tŭ do, tàm càr Dăk Lăk neh geh rơlao 55 rơbô 200 hìu geh pà phan satềp mờ kờp jơh priă rơlao 25 tơmàn đong. Jăt mò Nông Thị Thu, Phó Củ tịc Anih duh broă Mặt trận Dà lơgar Việt Nam càr Dăk Lăk đơs, càr gàr tơl jơh ală hìu rơƀah, hìu pa lik klàs rơƀah ndrờm geh pà phan, geh tơl bơta nàng chờ Nam pa, wă rò Satềp di mờ gùng dà broă lơh “ờ geh cau lơi gơtìp sơrbì is hờ tơnơ̆”. “Tam pà 1 rơbô 550 pò phan mờ khà priă tơl pò geh 500 rơbô đong tă bơh Kes priă Tài cau rơƀah càr dê. Mờ pơgồp bal nền nòn mờ ală mpồl lơh broă bal bơh đah Mặt trận dê, lơh ală broă lơh drơng gàr Satềp ai cau rơƀah jăt mpồl lơh broă bal dê kung bè là broă pơgồp bal mờ Mặt trận mờ ală mpồl lơh broă, ală tiah bơyai lơh ală broă lơh di Satềp nam pa Ất Tỵ nam 2025”.

Ală ngai do, Broă lơh “Satềp tơrgùm – Nam pa ưn ngài Đảng” mờ Drà Satềp kông đoàn nam 2025” tàm càr Dăk Lăk kung pal geh bơyai lơh mờ uă broă lơh geh kwơ màng ngan, lơh ram nùs cau lơh broă. Tàm broă lơh, Mpồl bơyai lơh neh jào pà 400 pò phan tus đoàn viên, cau lơh broă, geh 800 rơbô đong tàm 1 nă; dong kờl priă lơh 11 nơm hìu “Hìu ram kông đoàn” mờ kờp jơh priă 550 tơlăk đong. Geh dờp hìu ram kông đoàn di tàm dơ̆ do, lŏ H’ Ben Mlô, cau pơgru bơto mẫu giáo tàm sàh Ea H’đing, kơnhoàl Cư̆ Mgar pà git: “Ngai do añ chờ hờp ngan tŭ geh ală anih lơh broă dong kờl ai añ in geh lơh hìu ram kông đoàn nam 2025. Añ rơcang bồ nhai 3 tus, añ rơ̆p mŭt lơh hìu. Mùl màl añ gŏ gơlơh gơboh gơbài ngan mờ ram ngan”.

Broă lơh “Drà Satềp kông đoàn nam 2025” tàm càr Dăk lăk geh bơyai lơh mờ broă tus bal bơh 50 mpồl lơh broă, mpồl lơh sa kă bro dê. Mờ kờp jơh phan geh pà mờr 1 tơmàn đong, tàm do geh bơyai lơh uă broă lơh geh kwơ bè pà sră blơi phan ờ sa priă, kham bơta pràn kơl dang să jan, pơlam adăt boh lam mờ ală broă lơh nhơl chờ ai đoàn viên, cau lơh broă in. geh blơi phan di mờ nùs tàm dơ̆ satềp, lŏ Tống Thị Thu Thoi, lơh broă tàm kông ty lip sră Dăk Lăk pà git: “Jơh ală oh mi cau ùr lòt drà Satềp kông đoàn nam 2025, tus tàm do den gŏ ală hìu tăc phan uă bơta ngan, phan lơi kung geh uă. Tus tàm do geh uă phan pà, kông đoàn neh tă ală pang sră nàng blơi phan pà, tam gơl phan pà. Đơs ngan là geh uă bơta niam, uă phan pà cau lơh broă in tus bal”.

Geh git, di Satềp nam pa Ất Tỵ nam do, càr Dăk Lăk tă rơlao 75 tơmàn đong nàng còp să, pà phan ală cau geh sră dong kờl bal mờ cau lơh broă in. Bal mờ hơ̆, 138 anih lơh broă, mpồl ling, kwang àng rơ̆p dờp phan mờ priă geh bơh 3 tus 7 tơlăk đong. Kwang đơng lam bồ càr kung rơ̆p còp mờ pà 54 pò phan ai cau geh màng mờ dà lơgar pơnrơ jăk in bal mờ ală anih lơh broă, mpồl lơh broă tàm càr in.