Rbàng Rạch Miễu 2 (ƀă gan dà dờng Tiền) tơrbŏ bal càr Tiền Giang mờ Bến Tre geh kờp jơh priă tă lơh rlau 6 rbô 800 tơmàn đong gam jal mhar geh lơh sir nàng ai ngui. Bè hơ̆, Bến Tre mờ Tiền Giang neh geh 2 nơm rbàng tàm tơrbŏ 2 gah àr, bơsong bơta gơ kòl rơndeh gơlik geh jŏ jòng sùm tàm uă nam do. Ồng Trần Văn Bon, Kwang lam bồ Sờh Bơt bơtàu càr Tiền Giang chờ hờp pà git: “Rbàng Rạch Miễu 2 do neh lơh gơs rlau 80%, rơndap broă lơh do lơh gơs lơyài ngan rlau jơh là ngai 02/9/2025. Do là broă geh gơtha dờng màng ngan ai broă bơtàu tơnguh lơh sa – mpồl bơtiàn 2 càr Tiền Giang – Bến Tre mờ ală càr tiah kềng gah dà lềng bơh tiah do dê in”.

Mờ uă bơnah priă bơcri bơh dà lơgar, càr, kờp bal pah nam, càr Tiền Giang lời bơcri rlau 800 tơmàn đong nàng lơh phan bơna gùng lòt. Ală rơndap broă lơh rề ơnàng, lơh niam ală gơl gùng ù gờl kuơmàng neh lơh gơs, broă lòt rê làng bol dê ƀuơn ngan, rơndeh oto gơtùi lòt tus ală sàh, ală ƀòn. Ồng Ngô Tấn Lâm, ơm tàm sàh Tam Bình, kơnhoàl Cai Lậy, càr Tiền Giang đơs: “Añ kis tàm 2 rài atbồ, añ gŏ rài do lơngai ngan, gùng lòt ƀòn lơgar geh lơh uă. Hìu lơi kung geh rơndeh măi 2, 3 nơm, làng bol pas sơm.Rbàng, gùng lòt tŭ do he lòt ring niam, bồt Ngũ Hiệp tŭ do ƀă geh rbàng den chờ hờp ngan, làng bol brồ guh lơh pas. Ală nam lài do, làng bol lơh hìu bơnàng ù, mơya tŭ do lơh hìu bê tông, geh cau lơh hìu 3 tus 5 cờn. Anih blơi phan lơh gơs bơh suơn sre kơnờm geh rbàng mờ ƀuơn ngan, niam ngan”.

Bến Tre neh geh tŭ geh sền là bồt bơlàu tài geh lơh gơs bơh 3 bồt, dà dờng, rbòng dà uă ngan. Tus tŭ do ală anih plung ơm tàm dà dờng neh geh ala mờ ală rbàng bê tông kơ̆ kơljap. Nam lài, Bến Tre là càr sơn rờp bơh tiah ring dà dờng Cửu Long dê sơn đờm lam lơh rơndap broă lơh lơh gùng ù gờl kềng gah dà lềng. Ồng Nguyễn Trúc Sơn, Phó Củ tịc Anih duh broă làng bol càr Bến Tre pà git: “Gùng ù gờl kềng gah dà lềng den nam 2024 bol hi neh sơn đờm lơh dùl gơl mờ dùl nơm rbàng. Nam 2025, bol hi pơn jat tai lơh gùng ù gờl kềng gah dà lềng do, lài ngan là tàm tơrbŏ bal mờ càr Tiền Giang, càr Trà Vinh là 2 càr geh phan bơna dờng ngan mờ bol he tơrgùm jơh bơta pràn, priă jền sơn đờm lơh broă lơh do tàm nam 2025, mờ priă jền neh geh rơndap ai tơngai bơh nam 2024 tus nam 2025 in”.

Tus tŭ do, càr Sóc Trăng geh 17 gơl gùng lơh gơs ală gơl gùng lòt tàm tơrbŏ bal, pơgồp bơnah bơtàu tơnguh lơh sa – mpồl bơtiàn mờ gơ hòi gơ jà bơcri priă ală rơndap broă lơh tàm càr. Kuơmàng, kờp dŭ tus ngai 30/4 nam do, rbàng Đại Nghĩa 2 mờ bơnah gùng nàng tơrbŏ bal 2 kơnhoàl Long Phú mờ Cù Lao Dung, càr Sóc Trăng rơp geh lơh gơs, lơh gơlik bơta tàm tơrbŏ bal gùng lòt ƀuơn ƀuài đah ală càr kềng gah dà lềng tiah đah jum dà lơgar bal mờ gơp mờ ƀòn dờng Hồ Chí Minh. Ồng Nguyễn Thanh Chiều, Kwang lam bồ Mpồl lơh broă bal Broă lơh sa suơn sre An Phát tàm sàh An Thạnh 1, kơnhoàl Cù Lao Dung, càr Sóc Trăng đơs: “Lài do, Cù Lao Dung gơtìp dà dờng bơr kòl, dilah he kờñ tiă gan dà dờng kung kal ke sơl. Rbàng Đại Nghĩa lơh gơs, ai lòt rê den Mpồl lơh broă bal bol hi rơp bơtàu tơnguh rlau, geh bơta pràn tàm pơrlòng uă rlau mờ ală bơta plai chi, ngan là pơ ò. Bol hi gam geh broă rơndap lơh lơh anih lơh pơ ò pơr lơ iang mờ lơh lòt nhơl sền brê bơnơm”.

Tàm ală càr ndai bè An Giang, Đồng Tháp, Cà Mau, Vĩnh Long phan bơna gùng lòt kung geh tă priă lơh sir, tơrmù lơyah bơta yah ngài mờ ală tiah, tơrmù tŭ jơ lòt rê làng bol dê.

Jat Ƀộ Bơt bơtàu pà git, tŭ do, tiah ring dà dờng Cửu Long neh mờ gam lơh 9 rơndap broă lơh gùng lòt kuơmàng dà lơgar mờ kờp jơh priă bơcri mờr 106 rbô tơmàn đong. Gơtùi đơs nền, ờ hềt tŭ lơi phan bơna gùng lòt tiah ring dà dờng Cửu Long geh tơrgùm priă jền bơcri uă bè tŭ do. Jat rơndap ù tiah tus nam 2030, tiah ring dà dờng Cửu Long geh mờr 1 rbô 200 kơi sồ gùng rơndeh lòt mhar mờ 3 gơl gùng jat gùng tiah đah tô – tiah đah jum mờ tiah đah mat tơngai lik – tiah đah mat tơngai mut. Tus tŭ do, tiah do kung neh rơndap ù tiah ƀlàng rơndeh par, gùng lòt tàm dà tàm tiah do.

Mùl màl neh ai gŏ, gùng lòt lòt lài, lơh sa bơtàu tơnguh jat bơh ngkời. Nam lài, khà gơguh lơh sa bơh tiah ring dà dờng Cửu Long dê geh 7,3%, jơnhua rlau mờ khà kờp bal bơh gùt lơgar dê. Priă lơh geh kờp bal 1 nă cau tàm tiah do geh 80 tơlak 700 rbô đong tàm nam 2024.

Mờ ală broă lơh, rơndap broă lơh phan bơna gùng lòt gam geh lơh gơs mờ jal mhar lơh gơs tàm ală nam tus rơp là bơta niam kuơmàng ngan dong tiah 9 nơm dà dờng brồ guh bơtàu tơnguh, kơ̆ kơljap cơnđuà mut tàm rài pa bơh dà lơgar dê.