Ngai 12/02, ală kơnhoàl, ƀòn dờng bơh càr Lâm Đồng dê dồ ròt bơyai lơh chờ lòt ling nam 2025, bal mờ rlau 1 rbô 200 nă cau ling pa rơcăng lòt gùng lòt ling, tàm hơ̆ mờr nggùl là làng bol jơi bơtiàn dồ êt nă cau. Nam do, càr Lâm Đồng geh rlau 1 rbô 200 nă cau ling pa lòt gùng lòt ling, tàm hơ̆ mờr nggùl là làng bol jơi bơtiàn dồ êt nă cau mờ rlau 50% geh sră dan is tus bal lơh kơnòl pal lơh broă ling klàng. Tàm khà do, cau ling pa geh bồ jơnau bơsram trung kâp, kao đẳng, đại họk geh tus 7,6%, kâp pe geh tus rlau 36%, is ồn geh 23 nă cau ling pa là đảng viên, tàm hơ̆ geh 11 nă đảng viên làng bol jơi bơtiàn dồ êt nă cau.

Cau ling pa Lơ Mu Tha Ni, đảng viên, 21 sơnam, cau K’Ho ơm tàm thôn Dà Nghịt 1, sàh Lát, kơnhoàl Lạc Dương chờ hờp pà gĭt, să tờm mờ hìu bơnhă pơñiờ să ngan tŭ sră dan is tus bal lơh kơnòl pal lơh broă ling klàng geh dờn, ngan ngồn gơgơs cau ling pa lòt gùng lòt ling nàng geh tă pơgồp dà kơlhề, bơ̆t bơtàu mờ sền gàr Dà lơgar.

Bulah neh jơh bơsram Đại họk, geh broă lơh kơ̆ kơl jăp, mơya uă ơruh pơnu tàm càr Gia Lai kung gam jơh nùs dan lòt ling is, tàm pơdờn bơhiàn hìu bơnhă mờ bơta kơ̆p kờñ tă pơgồp dà kơl hề ai Dà lơgar in. Lài mờ ngai mut tàm mpồl ling, bi Lê Thị Hồng Ngọc, ơm tàm sàh Diên Phú, ƀòn dờng Pleiku, pơn yờ să sền dờng sră dan lòt ling is ai jơh hìu bơnhă in iăt. Ndrờm bè hơ̆ sơl, ơruh Lê Thanh Mai ơm tàm sơnah ƀòn Yên Thế, ƀòn dờng Pleiku kung ntào dờng tàm dùl hìu bơnhă ling geh griăt; bulah neh jơh bơsram Đại họk mìng gah Y dược, mơya dơ̆ do kung cih sră lòt ling is.

Is ồn, tàm dùl hìu bơnhă mìng lơh sa suơn sre tàm sàh Ia Piar, kơnhoàl Phú Thiện, càr Gia Lai, klau pơnu kòn cau Jrai- Ksor Thanh pa jơh bơsram Hìu bơsram Đại họk Luật- Đại họk Huế, kung crăp rcang lòt gùng lơh jat kơnòl pal lơh ling klàng dơ̆ do dê.