Bí thư Tỉñ ủy càr Dăk Lăk cih dờp mờ jờng rơ uă ngan ală tă pơgồp bơh Anih jơnau đơs Việt Nam (VOV) dê đơs bal mờ Anih lơh broă sùm tiah Tây Nguyên đơs is gơwèt mờ broă lơh bơt bơtàu Đảng, bơt bơtàu ală anih lơh broă chính trị mờ bơtàu tơnguh lơh sa- mpồl bơtiàn bơh càr Dăk Lăk dê tàm tơngai pa do.

Ồng đơs là, ală broă lơh, jơnau cih bơh VOV dê neh cih yal niam ngan ală gah lơh sa- mpồl bơtiàn, rài kis làng bol ală jơi bơtiàn tàm càr; lòt bal mờ broă lơh bơt bơtàu Đảng, bơt bơtàu ală anih lơh broă cíñ trị mờ đơng lam sồr lơh. Mờ bơta pràn bơh gah pờ tơlik jơnau đơs, VOV neh ai gùng dà broă lơh bơh Đảng mờ Dà lơgar dê tus rềp rlau tai mờ tiah sar lơgar ngài, tiah làng bol jơi bơtiàn dồ ết nă cau; pơgồp bơnah lơh kơ̆ kơl jăp mpồl tam klăc dờng gùt làng bol, gàr kơ̆ kơl jăp chính trị- mpồl bơtiàn tàm ù tiah càr dê. Bí thư Tỉñ ủy càr Dăk Lăk kơ̆p kờñ VOV pơn jat tai lơh jat bơta pràn, lơh pràn yal tơngĭt jơnau uă gah bè broă lơh đơng lam, sồr lơh bơh càr dê; cih yal nùs nhơm, bơta kơ̆p kờñ di pal bơh làng bol dê; lơh gơ rề uă ală broă lơh niam, broă lơh geh cồng nha mờ lòt bal mờ càr tàm gùng lòt bơtàu tơnguh.