Tàm pơrjum, ală cau ala mat neh iăt yal Jơnau lơh nền tơnggơs mpồl sền sơwì, jat hơ̆, Ƀí thư Đảng ủy Cíñ phủ, Thủ tướng ồng Phạm Minh Chính lơh Kwang atbồ mpồl sền sơwì sồ 1908 mờ Ƀí thư Đảng ủy Quôk hội, Củ tịc Quôk hội ồng Trần Thanh Mẫn lơh Kwang atbồ Mpồl Sền sơwì sồ 1910.

Tơngmue sền sơwì tơrgùm tàm ală broă, bè: broă tơn jơh Jơnau lơh nền tàm pơrjum sồ 18, ngai 25/10/2017 bơh Mpồl duh broă Đảng Dà lơgar khoă 12 “Bàr pe broă bè pơn jat tai tam gơl pa, rơndăp tăp sèng mpồl lơh broă bơh ală anih lơh broă cíñ trị tơrmù di pal, lơh broă gơtùi mờ geh cồng nha” mờ Jơnau đơs pơpŭt sồ 121 ngai 24/1/2025 bơh Mpồl duh broă Đảng bè tơn jơh Jơnau lơh nền tàm pơrjum sồ 18, pơgồp bal mờ broă tơnggơs mờ broă lơh bơh ală Đảng ƀộ pa. Đơs tàm pơrjum, Thủ tướng Cíñ phủ ồng Phạm Minh Chính pà gĭt, nàng kờñ lơh jat jơnau sồr do, Duh broă sùm Đảng ủy Cíñ phủ kung neh geh broă rơndăp lơh lòt sền lài. Jat tàm ală bơta hơ̆, Đảng ủy ală anih lơh broă bơh Cíñ phủ dê mhar lòt sền, yal jơnau tơrgùm bal jat ală jơnau sồr bơh jơnau lơh nền sền sơwì, pơyoa ală kwang bàng tàm Mpồl sền sơwì in. Thủ tướng kơ̆p kờñ, ală đảng ƀộ gơwèt Đảng ủy Quôk hội, Đảng ủy Cíñ phủ lơh jat mhar, niam, geh cồng nha, di mờ jơnau cih.