1.Pơrjum dờng cau ala măt gùt lơgar dơ̆ 13 Đảng dê geh cồng nha “Niam bơnĕ ngan”.

Tổng Ƀí thư ồng Nguyễn Phú Trọng đơs: “Pơrjum dờng cau ala măt gùt lơgar dơ̆ 13 Đảng he dê neh geh cồng nha niam bơnĕ ngan!”. Pơrjum dờng geh ai 6 kơnòl tờm mờ 3 broă lơh pràn jŏ jòng; ai tơlik gùng dà, broă lơh, jơnau kờñ, kơnòl bơh kăc màng dà lơgar he dê tàm 5 nam tus, hơ̆ là tus nam 2025, lơgar Việt Nam là lơgar gam tơnguh bơtàu, geh broă lơh sa mờ măi mŏk pa, sơrlèt mờ khà priă geh bè ờs ờ uă, ai geh gùng dà broă lơh tus nam 2030, tơnkah 100 nam ngai crơng gơs Đảng, lơgar he là lơgar gam tơnguh bơtàu, geh broă lơh sa mờ măi mŏk pa, priă geh bè ờs uă mờ wèt tus nam 2045, tơnkah 100 nam crơng gơs dà lơgar, lơgar Việt Nam gơs lơgar tơnguh bơtàu, priă geh uă. Pơrjum dờng geh ai: “Dà lơgar neh geh ală cồng nha dờng màng, geh kuơ rài lài do, tơnguh bơtàu pràn kơl dang, tơl ală bơta pơn drờm mờ ală nam lài mờ tam gơl pa. Dà lơgar he ờ hềt tŭ lơi geh bơta niam, bơta pràn, gơngă mờ nùs nhơm pin dờn dunia bè tŭ do”.

Pơrjum dờng dơ̆ XIII bơh Đảng dê neh lơh geh cồng nha niam bơnĕ

2. Dơ̆ tĕ khà kwang bàng Quôk hội khoă XV mờ kwang bàng Hội đồng Ñân zân ală kâp tơngai lơh broă bơh nam 2021- 2026 lơh geh cồng nha tàm tơngai kòp bơtờp lơh bơtờp wơl

Ngai 23/05/2021, mờr 70 tơlak nă cau tĕ khà neh tus bal đùh sră (lơh geh khà 99,6% cau tĕ khà lòt pồ) tĕ khà kwang bàng Quôk hội khoă XV mờ Hội đồng Ñân zân ală kâp tơngai lơh broă bơh nam 2021- 2026, uă rlau bè khà cau mờ jơnhoa rlau bè khà pơndrờm mờ dơ̆ tĕ khà lài. Dơ̆ tĕ khà geh lơh làng bol lơh tờm, di mờ adat boh lam, ring bal, sền gàr ờdo ờdă, tềm pềr mờ ngan ngồn là Ngai chờ dờng bơh jơh tơl nă làng bol dê. Dơ̆ tĕ khà, neh lời wơl uă jơnau pơnrơ àng, uă tềl kah “dơ̆ sơnrờp”, bè: dơ̆ sơnrờp bơyai lơh tĕ khà lơh geh cồng nha, ờdo ờdă tàm tơngai kòp dờng Kovid-19 lơh bơtờp wơl; dơ̆ sơnrờp tàm rài kah yau 76 nam bơh Quôk hội dê geh 02 nă kwang bàng ala măt bơh ală jơi bơtiàn kòn cau dùl êt nă cau là kòn cau Lự mờ kòn cau Brâu mŭt lơh broă tàm Quôk hội.

 Dơ̆ tĕ khà kwang bàng Quôk hội khoă XV mờ kwang bàng Hội đồng Ñân zân ală kâp tơngai lơh broă bơh nam 2021- 2026 lơh geh cồng nha tàm tơngai kòp bơtờp lơh bơtờp wơl

3. Chồl pràn ală broă lơh bal mờ lơgar ndai, tơnguh uă bơngă dà lơgar dê

Nam 2021, bŭ lah kòp Kovid-19 gam gơtìp kal ke tàm gùt plai ù, mơya ală broă lơh bal mờ lơgar ndai uă bơta bơh lơgar Việt Nam dê gam geh bơyai lơh sùm. Geh pơnrơ ngan là broă Tổng Ƀí thư ồng Nguyễn Phú Trọng cri bơyai mờ kwang đơng lam ală lơgar, bơyai wă uă mpồl kuang bàng bơh dunia; Củ tịc lơgar ồng Nguyễn Xuân Phúc còp lơgar Nga, Cuba, Campuchia; Thủ tướng Cíñ phủ ồng Phạm Minh Chính còp lơgar Nhờk, tus pơrjum dờng mpồl ASEAN dơ̆ 38, 39 mờ ală pơrjum dờng gơrềng bal; tus bal pơrjum dơ̆ 26 ală gah tus bal Kông ướk Liên hợp quốc bè tam gơl trồ tiah (COP26) mờ tìp bal bàr đah mờ ală kwang bàng đơng lam ală lơgar, còp mờ lơh broă tàm lơgar Anh, còp mùl màl lơgar Tây; Củ tịc Quốk hội ồng Vương Đình Huệ còp câu Âu, lơgar Hàn Quốk, Ấn Độ...Nam 2021, pơrjum lơh broă bal mờ lơgar ndai gùt lơgar lơh jăt Nghị quyết pơrjum dờng dơ̆ 13 bơh Đảng là pơrjum gùt lơgar sơnrờp ngan geh Ƀộ Cíñ trị, Ƀan Ƀí thư đơng lam tơn broă bơyai lơh nàng cri bơyai bè broă lơh bal mờ lơgar ndai Đảng, lơh broă bal mờ lơgar ndai Dà lơgar, lơh broă bal mờ lơgar ndai làng bol mờ jơh gùt mpồl lơh broă cíñ trị. Tàm nam 2021, lơgar Việt Nam pơn jăt tai dờp dơ̆ lĕ bal kơnòl kuơ màng bơh dunia dê, là Củ tịc pơdar bal nhai 4 mờ Ủy viên ờ duh broă sùm Hội đồng bảo an Liên Hợp quốc, geh pồ lơgar tàm mpồl đơng lam bơto bơtê, Khoa học mờ bơta chài rơgơi Liên Hợp Quốc (UNESCO). Lơgar Việt Nam neh rơcang mờ tus bal tàm broă lơh bal bơh ală mpồl lơh broă dunia dờng; pơgồp mùl màl tàm broă cri bơyai, jòi geh broă lơh, di pal mờ broă sền gròi bal bơh mpồl bơtiàn dunia dê, geh ală lơgar đơs niam, tơlik bơta dờng pràn mờ bơngă dunia ngai sơlơ uă lơgar he dê.

 Chồl pràn ală broă lơh bal mờ lơgar ndai, tơnguh uă bơngă dà lơgar dê

4. Pơrjum Niam chài gùt lơgar lơh tơngkah wơl bơta kơ̆p kờñ ngan jơi bơtiàn dê, ngui niam bơta kwơ niam chài, bơta pràn kòn bơnus Việt Nam

Tơnơ̆ 75 nam, đòm jăt ală bơta niam chài ngan neh ai geh bơh bàr dơ̆ Pơrjum Niam chài gùt lơgar nam 1946 mờ nam 1948 dê, Pơrjum Niam chài gùt lơgar nam 2021 geh gơn kơnờm tàm pơdờn tai gùng lòt “niam chài sòl pơnđàng gùng ai làng bol dà lơgar in lòt”, ơn bơta niam chài ndrờm pal mờ cíñ trị, lơh sa, mpồl bơtiàn. Pơrjum Niam chài gùt lơgar là bơnàng jă ai dà lơgar he pờ tơlik dùl tŭ tơngai bơtàu tơnguh pa, bal mờ dùl jơnau kơ̆p kờñ lơngăp lơngai is, pơđơl pràn is bơh làng bol he dê, bơh hơ̆ ai geh ală broă lơh bơtàu tơnguh rài niam chài Việt Nam gơguh jak, bềng uă rài kis niam chài is jơi bơtiàn dê tàm ală broă lơh bơ̆t bơtàu mờ bơtàu tơnguh dà lơgar.

Đơs sồr lơh tàm pơrjum, Tổng Ƀí thư ồng Nguyễn Phú Trọng kơ̆p kờñ, broă lơh niam chài ngan ngồn geh bơta tam gơl pa, gơguh jak pa, pràn kơldang rlau, geh cồng nha rlau tai, cih tềl dùl tềl pa tàm gùng lòt bơtàu tơnguh wơl, bơtàu tơnguh rài niam chài Việt Nam tàm tŭ tơngai pa.

 Pơrjum Niam chài gùt lơgar lơh tơngkah wơl bơta kơ̆p kờñ ngan jơi bơtiàn dê, ngui niam bơta kwơ niam chài, bơta pràn kòn bơnus Việt Nam

5. Kòp Kovid-19 lơh gơbàn hoàc hươr uă ngan. Lơgar Việt Nam lơh jăt ală broă lơh lơh cĭt vaccine rơcăng sơndră kòp uă ngan bơh lài tus tŭ do

Dơ̆ kòp Kovid-19 gơtờp dơ̆ 4, mìng là tam gơl să Delta bơh virus Sars KoV-2 gơtờp mờ khà mhar ngan neh lơh aniai uă ngan, geh bal màng kis bơh làng bol mờ broă lơh sa mpồl bơtiàn ală càr, ƀòn dờng tàm gùt lơgar, tàm hơ̆ uă ngan là ƀòn dờng Hồ Chí Minh mờ ală càr hờ đah jum dà lơgar. Mờr 30 rơbô nă cau gơtìp chơ̆t, 346 rơbô tơmàn đong priă gơtìp hoàc huơr bè broă lơh sa là ală hoàc huơr uă ngan mờ kòp Kovid-19 lơh gơtìp tus mờ dà lơgar he. Mơya, kơnờm mờ ală broă lơh pràn kơl dang, tơrgùm bal jơh, tus tŭ do, kòp Kovid-19 bŭ lah gam gơtìp kal ke mơya neh geh sền gròi. Cíñ phủ tơlik kơrnoăt lơh Kes priă sơnơm vaccine rơcang sơndră mờ kòp Kovid-19. Dùl broă cit sơnơm geh lơh dờng ngan bơh lài tus tŭ do tàm lơgar Việt Nam neh geh Thủ tướng Cíñ phủ ồng Phạm Minh Chính lam sồr. Bal mờ hơ̆ là broă “lơh broă bal mờ lơgar ndai vaccine” geh lơh mhar, lơgar Việt Nam neh dờp mờr 170 tơlăk đing sơnơm vaccine rơcang sơndră mờ kòp Kovid-19. Tơn jơh nam 2021, lơgar Việt Nam neh lơh gơs cit 2 ding sơnơm vaccine ai cau bơh 18 sơnam rơlao hờ đang in, lơh gơs broă cit ding dơ̆ 1 ai cau bơh 12 tus 18 sơnam in. Lơh jăt jơnau kờñ “ai bơta pràn kơl dang să jan, màng kis làng bol rơlao jơh, lài jơh”, tềng đăp mờ broă đơng lam bơh Đảng dà lơgar, Cíñ phủ, Thủ tướng Cíñ phủ, broă rơcang sơndră mờ kòp neh geh ală kơrnoăt tam gơl di tŭ nàng rơcang sơndră mờ kòp Kovid-19, bơh broă lơh “zero Kovid-19” tus mờ broă “gơdờp bal ờ do ờ dă, ndrờm bal, sền gròi geh cồng nha kòp Kovid-19”, mờ rơcang sơndră mờ kòp mờ brồ guh, tơnguh bơtàu broă lơh sa mpồl bơtiàn di jăt mờ nghị quyết sồ 86 mờ nghị quyết sồ 128 bơh Cíñ phủ dê. Uă broă lơh rài kis lơh broă sa mpồl bơtiàn mờ khà priă geh bơcri git nđờ tơmàn đong neh geh lơh, dong kờl cau lơh broă, cau ờ pràn, làng bol tàm tiah gơtìp kòp sơrlèt mờ uă kal ke tàm rài kis.

Kòp Kovid-19 lơh gơbàn hoàc hươr uă ngan. Lơgar Việt Nam lơh jăt ală broă lơh lơh cĭt vaccine rơcăng sơndră kòp uă ngan bơh lài tus tŭ do

6. Sơrlèt gan bơta kal ke ngan tài bơh kòp Kovid-19, GDP kung gam gơguh tai dưong sơl. Uă jơnau niam ngan, lơh gơlik bơnàng jă bơtàu tơnguh wơl lơh sa tàm nam tus

Bulah kòp dờng Kovid-19 lơh gơlik jơnau gơlời wơl kơn jơ̆ ngan mơya mờ bơta đơng lam kràñ cê jơh nùs, ngac ngar ngan bơh Cíñ phủ dê, bơta dùl nùs bal jơh nùs lơh ngan bal bơh ală kâp, ală gah, ală tiah mờ bơh làng bol dê, yal lài GDP bơh lơgar he dê tàm nam 2021 kung gam gơguh tai dương sơl; tă dia dà lơgar tàm nam 2021 kung gam lơh jăt di tŭ tơngai kờp dŭ lài sơl mờ gơguh pơndrờm bal dùl tŭ mờ nam 2020, priă lơh geh bơh tăc mờ blơi phan mờ lơgar ndai lơh geh khà uă ngan rlau jơh bơh lài tus tŭ do bal mờ khà rlau 600 tơmàn dolar Mỹ. Mpồl lơh sa kă bro lơgar Việt Nam dê kung neh gĭt ngui jơh tŭ tơngai niam ngan bơh ală Hiệp định kă bro khăt gơboh, ngan là hiệp định rài pa, dong lơh uă drà mơkung rề ơnàng drà tăc ală bơta phan bơh jŏ sùm geh bơta pràn tus tàm ală drà geh bơta pràn, gơ ai priă jền gơguh tai uă rlau. Nam 2021 kung geh lơh tềl bơta bơtàu tơnguh pràn ngan bơh kă bro điện tử mờ lơh sa sồ dê.

Nàng lơh geh jơnau kờñ gơguh tai, tàm nam 2021, Việt Nam neh ngui mờ ndrờm bal ngan ală gùng dà broă lơh nam kes priă mờ priă jền kung bè ală broă dong kờl dờng ndai. Quôk hội kung neh geh uă Kơrnoăt bè priă jền kes priă, bơcri priă jền dà lơgar, rơndăp tăp sèng wơl rài lơh sa. Cíñ phủ bơ̆t bơtàu broă lơh jơh ală bơta bơtàu tơnguh wơl lơh sa- mpồl bơtiàn jăt gùng dà gơdờp bal ờdo ờdă mờ ngac ngar; bơ̆t bơtàu broă lơh jŏ jòng rơcăng sơndră kòp Kovid-19.

Sơrlèt gan bơta kal ke ngan tài bơh kòp Kovid-19, GDP kung gam gơguh tai dưong sơl. Uă jơnau niam ngan, lơh gơlik bơnàng jă bơtàu tơnguh wơl lơh sa tàm nam tus

7. Rơcăng bơ̆t bơtàu mờ lơh niam wơl Đảng pơn jăt tai geh chồl pràn tơl ală bơta, geh broă lơh gơguh pa. Rơcăng sơndră sa kwề sa kwà, ờ niam “ờ ơm, ờ jơh”

Pơrjum Dà lơgar 4 khoă 13 tơlik jơnau đơs pơn dŭt sồ 21, tàm hơ̆ geh pơgồp bal broă bơ̆t bơtàu, lơh niam wơl Đảng mờ broă bơ̆t bơtàu mpồl lơh broă cíñ trị; bơtơl tai ală bơta tơngŏ bơh broă ờ niam bè nùs nhơm cíñ trị, nùs nhơm, rài kis. Ƀộ Cíñ trị ring bal bơtơl tai tơngu me “ờ niam”, lơh tơl Mpồl đơng lam dà lơgar bè broă rơcang sơndră mờ sa kuề sa koà, ờ niam; mờ lơh tơl khà kwang bàng tàm Mpồl đơng lam. Ƀan Cấp hàñ Đảng dà lơgar, Ƀộ Cíñ trị neh tơlik 3 sră nggal kuơ màng gơrềng tus mờ broă bơ̆t bơtàu, lơh niam wơl Đảng mờ uă bơta pa geh pơnrơ. Hơ̆ là: Jơnau đơs pơn dŭt sồ 14 bơh Ƀộ Cíñ trị bè gùng dà lam sồr mờ sền gàr kwang bàng ñhăp ñhar, bơceh lơh tài bơta kuơ bal; kơrnoăt sồ 37 bơh Ƀan Cấp hàñ Đảng dà lơgar bè ală bơta cau geh đảng ờ gơtùi lơh; Kơrnoăt sồ 14 bơh Ƀộ Cíñ trị bè broă ờ pồ, tơn jơh at gơnoar broă gơwèt mờ kwang bàng. Broă tam dră, rơcang sơndră mờ sa kuề sa koà, ờ niam pơn jăt tai geh đơng lam, lam sồr mờ lơh pràn, “ờ ơm, ờ jơh”. Ủy ƀan Kiểm tra dà lơgar neh tơrgùm sền gròi, bơsong, lơh glài mờ sồr lơh glài 12 mpồl đảng mờ 20 nă cau geh đảng gơwèt Ƀộ Cíñ trị, Ƀan Ƀí thư atbồ tài gơrềng tus mờ ală dơ̆ lơh tìs, broă lơh bơh Mpồl đơng lam sền gròi, đơng lam, tàm hơ̆ geh 3 nă kuang bàng geh jơng tàm Ủy viên Đảng dà lơgar, 2 nă thứ trưởng, 1 củ tịc càr lài do, 1 Phó Ƀí thư tỉñ ủy, 13 nă sĩ quan, kấp tướng tàm mpồl ling klàng.

Rơcăng bơ̆t bơtàu mờ lơh niam wơl Đảng pơn jăt tai geh chồl pràn tơl ală bơta, geh broă lơh gơguh pa. Rơcăng sơndră sa kwề sa kwà, ờ niam “ờ ơm, ờ jơh”

8. Yal yă mờ cah rña kràñ uă dơ̆ lơh tìs dờng, kơn jơ̆ mờ kal ke

Bulah gơtìp gơrềng uă ngan tài bơh kòp dờng Kovid-19 dê, mơya ală dơ̆ lơh tìs lơh sa, sa kwề sa kwà ndrờm geh ală kâp anih cah rña bơsong tàm jơnau ai bơh adat boh lam dê; lơh glài kràñ ngan gơwèt mờ ală cau lam bồ, cau lam lài, sơmờm gơnoar broă, gơnăp gơnoar nàng sa kơñau jơtài priă jền dờng bơh Dà lơgar dê. Nam 2021, Gah sền gàr adat boh lam yal yă pa uă dơ̆ lơh tìs dờng, kơn jơ̆ mờ kal ke, bè: Ală dơ̆ lơh tìs gơbàn tàm gah lơh sơnơm; dơ̆ lơh tìs gơbàn tàm bàr pe mpồl lơh broă gơwèt Gah đơng lam Kảnh sát dà lềng, Mpồl ling sền gàr tiah nhàr lơgar, ală dơ̆ lơh tìs jơnau sồr ătbồ ù tiah, ătbồ, ngui jơtài priă jền Dà lơgar dê gơlik geh tàm Bình Dương, Khánh Hoà mờ ƀòn dờng Hồ Chí Minh...

Sơmờm bơta jal mhar bè jơnau kờñ xét nghiệm tàm ală tiah tàm gùt lơgar, Kông ty Việt Á neh dùl nse bal mờ ală mpồl cau, cau dùl nă să is geh gơrềng, lơh tìs kơn jơ̆ ngan jơnau cih bè lơh gơlik, tàm pơrlòng jòi cau blơi ƀộ xét nghiệm kòp Kovid-19 nàng kờñ jòi sa kơñau priă jền. Lùp khàu bơh sơnrờp pà gŏ, Kông ty Kổ phần Kông nghệ Việt Á neh tăc ală ƀộ xét nghiệm kòp Kovid-19 ai 62 càr mờ ƀòn dờng in, priă lơh geh bơh tăc ală ƀộ xét nghiệm do mờr 4 rbô tơmàn đong. Anih lơh broă lùp khàu neh yal yă dơ̆ lơh tìs, yal yă cau gơtìp pin pơrdah lơh tìs nàng pơn jăt tai lùp khàu, lơh loh, mơya dơ̆ broă do kung tơlik uă jơnau lùp bè kơnòl bơh ală kâp, ală gah geh gơnoar dê tàm broă lơh jăt broă lùp sền, sền swì, lơh glài lơh tìs tàm broă rơcăng sơndră kòp Kovid-19.

Yal yă mờ cah rña kràñ uă dơ̆ lơh tìs dờng, kơn jơ̆ mờ kal ke

9. Gùng rơndeh ồs tàm ƀòn drà Cát Linh-Hà Đông mùl màl geh ngui lơh broă tơnơ̆ mờ uă dơ̆ ơm ing. Geh uă jơnau bơsram “Kuơ màng” geh ai bơh broă lơh jơ̆t nam do

Tơnơ̆ mờ 10 nam, 4 dơ̆ ơm ing, ngai 15/11/2021, gơl gùng rơndeh ồs ƀòn drà Cát Linh-Hà Đông-do là rơndăp broă lơh gùng rơndeh ồs tàm ƀòn drà sơnrờp ngan bơh Hà Nội dê bal mờ gùt lơgar mùl màl geh ai ngui lơh broă. Bơh tàm khà priă bơcri lài ngan rơlao 8 rơbô 770 tơmàn đong, rơndăp broă lơh do gơtìp “tơnguh priă” tus rơlao 18 rơbô 2 tơmàn đong. Jăt broă lơh rơndăp broă lài ngan geh ai gŏ tàm broă kă bro bơh nhai 6 nam 2015, tơnơ̆ mờ uă dơ̆ tơnjŏ tơngai, tus bồ nhai 11 nam 2021, gùng rơndeh ồs ƀòn drà Cát Linh-Hà Đông hơ̆ sồng geh ai ngui tài kơnờm mờ broă đơng lam pràn kơl dang bơh Cíñ phủ tơngai lơh broă pa. Ƀộ Giao thông Vận tải, UɃÑZ ƀòn dờng Hà Nội neh dờp kơnòl, ai gŏ bơta tờm, ai geh jơnau bơsram lơh gơtìp lơyài broă lơh, gơguh khà priă, tàm hơ̆ mìng là ală broă gơrềng tus mờ kơrnoăt tàm adăt boh lam bè bơcri priă lơh tờm mờ broă tơm ntrờn ù tiah.

Gùng rơndeh ồs tàm ƀòn drà Cát Linh-Hà Đông mùl màl geh ngui lơh broă tơnơ̆ mờ uă dơ̆ ơm ing. Geh uă jơnau bơsram “Kuơ màng” geh ai bơh broă lơh jơ̆t nam do

10. Dơ̆ sơnrờp tàm rài kah yau, mpồl coh plai dà lơgar Việt Nam coh gơmŭt tàm dar bơh sơnrờp dơ̆ 03 World Cup 2022 tiah câu Á

Nam 2021, mpồl coh plai Việt Nam dơ̆ sơnrờp coh mŭt tàm dar sơnrờp lồi dŭt World Cup tiah câu Á. Do ờ mìng là bơta cih dờp bè đah cồng nha mờ gam lơh tềl bơta sơrlèt gan bè bơta pràn jak mờ nùs nhơm bơh dùl rài coh plai dê. Broă geh bơsram tàp mờ ală mpồl coh plai khà dùl kơnhoàl ù tiah câu Á dong ală cau coh plai Việt Nam geh tai bơta mờng chài, bơta pin dờn rlau, khin cha rlau, mơkung lơh gơlik geh bơnàng jă nàng ală mpồl coh plai Việt Nam in pin dờn rlau tŭ mŭt tàm ală dơ̆ pơrlòng coh plai dờng tơnơ̆ do. Coh plai Việt Nam neh geh dùl bơta cơnđoà guh jòng nàng ơm tềng đăp mpồng mŭt bal World Cup bulah broă pờ mpồng hơ̆ kung gam sơl là jơnau ơm kơ̆p jơnau hơ.

 Dơ̆ sơnrờp tàm rài kah yau, mpồl coh plai dà lơgar Việt Nam coh gơmŭt tàm dar bơh sơnrờp dơ̆ 03 World Cup 2022 tiah câu Á

Cau mblàng Lơ Mu K’Yến mờ Ndong Brawl