VOV4.K’ho- Mang ngai 19/11, dơ̆ kah kơlôi làng bol roh tàm kòp dờng Covid-19 geh lơh tàm anih pờ tơlik tơn tờm là Hìu pơrjum Thống Nhất, ƀòn dờng Hồ Chí Minh mờ Công viên Thống Nhất, ƀòn dờng Hà Nội. Tàm anih pờ tơlik tơn tàm Hìu pơrjum Thống Nhất, ƀòn dờng Hồ Chí Minh, ală kuang đơng lam bồ Đảng, Dà lơgar geh mat tàm dơ̆ bơyai lơh neh lam lơh bơhiàn chu ñàng, ơn bơkàu kah kơlôi cau tờm, làng bol, cau lơgar ndai, cau ling gùt lơgar roh tài bơh kòp Covid-19.

Ala mat Đảng, dà lơgar, ồng Đỗ Văn Chiến, Bí thư Đảng dà lơgar, Chủ tịch Ủy ban Mặt trận dà lơgar Việt Nam ai tơnggŏ bơta pơlai soh, nđàc sơnggit jơh nùs, tam pà bal moat jrùm mờ ală hìu bơnhă geh cau phi să mờ chơt să tàm kòp dờng Covid-19. Ồng đơs nền, tài kòp gơlik geh kal ke ir, ngòt rơngơt ir den tàng bulah neh lơh ngan, mơya geh uă cau tŭ roh kung ờ hềt geh bơyai lơh ies mờ tơp wil tơl jat bơhiàn ờs mờng.

Tus ngai 19/11, gùt lơgar geh rlau 23 rbô nă cau chơt tài bơh kòp Covid-19, tàm hơ̆ ƀòn dờng Hồ Chí Minh geh rlau 74% mờ rlau 17 rbô nă cau roh. Kòp dờng Covid-19 neh ai tĕ bol he dê uă ngan bơta, lơh gơlik git nđờ bơta roh rui, jê sồt, moat jrùm. Kah kơlôi ală cau neh roh kung là jơnau tơngkah tơl nă bol he bè bơta kal ke bơta kòp bơtờp dê. Tŭ do, broă sơndră mờ kòp Covid-19 kung gam pơn jat tai geh lơh, bol he pal pràn kơldang rlau mờ lài, ờ gŏ di sền ờ sơp.

Cau mblàng K’Duẩn