VOV4.K’ho- Kàl pràng mrềt nam 2020-2021, kơnhoàl Lak, càr Dak Lak sih tam rlau 5 rơbô 300 lồ kòi sre, uă ngan tơrgùm tàm ală xã: Buôn Triết, xã Dak Liêng mờ xã Buôn Tría. Gam tàm tơngai tơnhào uă ngan, làng bol lơh broă sa tàm tiah kơh bơnơm do dê gam chờ hờp ngan tŭ nam do kòi geh tơnhào mờ geh giá tăc sơl.

Ờ ru ngan bal mờ hìu bơnhă tơrgùm khòm kòi tàm ƀlàng sre jun rê tàm tiah ơn tơrgùm, mò Nguyễn Thị Phán, ơm tàm thôn Buôn Tung 1, xã Buôn Triết, chờ hờp pà gĭt, mò sih tam rlau 4 lồ kòi sơntìl Đài Thơm 8. Cau kă bro lòt tus tàm sre blơi den broă tơnhào mờ tăc geh bơyai lơh ƀuơn ngan. Mò Phán kờp dŭ, hìu bơnhă digơlan geh priă cồng pơgap 150 tơlak đong tàm kàl lơh kòi do.

Bè hìu añ lơh kòi Đài Thơm den kung geh 1 tấn 2 tạ dùl sào. Ai giá tăc tàm drà kă bro den nam do uă rlau pơndrờm mờ nam lài, cau kă bro lòt blơi den toès tus tiah lơi añ kung kơng tus tềng hơ̆. Kòi giá tăc kung di đau sơl, nam do giá tăc kòi gơguh dùl ết den làng bol tăc kung gơ lơh ƀuơn ngan sơl.

Broă sih tam mờ tơnhào kòi geh lơh mờ rơndeh rơndồ măy mok lơm

Pơgap mờ hơ̆ ờ ngài, hìu bơnhă ồng Nguyễn Công Hùng, ơm tàm thôn Mê Linh 2, xã Buôn Triết, kung gam ờ ru ngan tơnhào kòi. Ồng pà gĭt, hìu bơnhă geh 5 lồ sre, ƀơh uă nam do ndrờm lơh kòi ST-24. Nam do, bal mờ lơh kòi, ồng gam tam gơl mờr 5 sào sre nàng tam bùm lo. Bơta chờ hờp uă rlau bàr dơ̆ tŭ kàl tơnhào nam do bùm lo kung tơnhào uă ngan sơl, giá tăc tàm sre geh bơh 8 tus 10 rơƀô đong dùl kĭ. Kòi kung ai tơnhào uă ngan sơl, giá tăc kòi kung uă rlau mờ tơl nam.

Nam do, sền gŏ lơh geh tơnhào rlau, pal 1 tấn 2 tạ tus 1 tấn 3 tạ dùl sào kòi ris, toès bè hơ̆ rê là kơng tơn, giă tăc cau kă bro blơi tàm khà 6 rơbô 700 đong dùl kĭ. Cau kă bro tus tơn tàm tiah do blơi.

Làng bol chờ hờp tài nam do kòi geh tơnhào mờ tăc geh giá tai

Là xã ờs lơh sa suơn sre, geh bă ù sre lơh kòi dờng ngan rlau jơh kơnhoàl Lak dê, tàm kàl mrềt prang nam do, xã Buôn Triết sih tam mờr 2 rơbô lồ kòi sre. Jat ồng Bùi Mạnh Hải, Chủ tịch UBND xã Buôn Triết đơs, nam do trồ tiah niam, ală bơtơ̆t rbòng dà ai tơl dà den tờm kòi dờng pràn niam, ai tơnhào uă. Kờp bal tơnhào geh 9 tấn tơl dùl lồ; mìng is, bàr pe sơltìl bè Đài Thơm 8, ST-24, ST-25 ai tơnhào gơguh tus bơh 12 tus 13 tấn. Kòi geh cau kă bro tus tơn tàm sre blơi, giá tăc geh bơh 5 rơbô 800 đong tus 7 rơbô đong dùl kĭ jat sơntìl kòi dê. Pơndrờm mờ giá tăc do uă rlau mờr 1 rơbô đong dùl kĭ pơndrờm mờ kàl lài.

Geh bơta sền gròi bơh Dà lơgar bơcri lơh gơl gùng lòt tàm xã kung bè bàr pe gơl gùng tàm dơlam ƀlàng sre den tàng ƀuơn ngan ai làng bol in tàm broă pơndiang phan lơh geh bơh lơh sa suơn srê. Dơ̆ 2 là trồ tiah den tus tŭ do trồ tơngai kung gam niam ngan sơl ƀuơn ngan ai làng bol in tơnhào kòi. Xã Buôn Triết geh bơhiàn lơh broă tàm pơgồp bal bơta mờng chài mờ ngui bơta chài khoa học kỹ thuật mờ geh bơta sền gròi bơh Anih bơto pơlam lơh broă sa mờ ală cau jak chài den tàng bàr pe sơntìl kòi mờ làng bol sih tam tàm ù tiah do dê den sền bal là lơh jat geh cồng nha mờ geh tơnhào.

Uă hìu bơnhă ìs kòi nàng tăc geh giá rlau tai

Kung  jat ồng Hải, nàng kờñ dong kờl làng bol sih tam kòi kơ̆ kơl jap, gơnoar atbồ tiah do neh bơyai lơh ală dơ̆ pơrjum cribơyai, bơto pơlam, tam pà bal bơta mờng chài jak chài lơh broă, sac rơwah sơntìl, gơsơ̆t tu kòp. Mờ xã kung dong kờl tàm tơrbŏ bal mờ ală Hợp tác xã gơwèt mờ ală mpồl lơh broă tăc sơntìl geh bơngă pin dờn mờ ală Hợp tác xã blơi phan lơh bơh suơn sre dê. Kơnờm bè hơ̆, ală nam pa do, cồng nha tơn hào kòi kơ̆ kơljap mờ ngai sơlơ uă rlau. Làng bol kung rcang lài ngui khoa học kỹ thuật, rơndeh rơndồ măy mok lơh sa den broă sơng ka sền gàr mờ tơnhào kòi ngai sơlơ geh cồng nha. Bal mờ tờm phan tam jŏ ngai, tờm kòi neh jòi geh tiah ơm tàm tiah kơh bơnơm do dê, pơgồp bơnah gàr niam phan ngui sa mờ khà priă lơh geh kơ̆ kơljap ai làng bol in.

Cau cih H’Xíu H’Mốc- Cau mblàng K’Hạnh