VOV4.K’ho - Lơh jăt Nghị quyết sồ 04 ngai 19 nhai 8 nam 2016 bơh Tỉnh ủy Kon Tum khoă 15 bè broă pơn jăt tai bơ̆t bơtàu ală xã kal ke uă ir tàm bơta pa, geh jào kơnòl lơh oh mi, dong kờl xã kal ke uă ir Văn Lem, kơnhoàl Đăk Tô, 5 nam do lơh niam gơnoar broă, kơnòl broă lơh tờm, Kes priă sền gàr mờ tơnguh bơtàu brê càr Kon Tum neh geh uă broă lơh mùl màl, geh cồng nha tàm broă dong kờl xã lơh oh mi bal atbồ, sền gàr mờ tơnguh bơtàu brê.

Ngai 18 nhai 6 lài do, lơh jăt broă lơh bơh Chi bộ Kes priă sền gàr mờ tơnguh bơtàu brê càr Kon Tum bè dong kờl, bơ̆t bơtàu xã lơh oh mi bal Văn Lem, kơnhoàl Đăk Tô, dùl mpồl lơh broă bơh Kes priă neh geh sồr pơgồp bal mờ Đảng ủy, UBND xã bơyai lơh lam sồr “Satềp tam chi rài rài kah ưn ngài Bác Hồ” nam 2021. Dơ̆ pơrjum lam sồr geh bơyai lơh tềng hìu rông chài rơgơi ƀòn Măng Rương, mờ broă tus bal bơh gal làng bol kis tàm ƀòn. Lŏ Y Bé, Bí thư Chi đoàn ƀòn Măng Rương pà gĭt: “Chờ hờp ngan ngai do geh ală Mpồl tus hờ ƀòn, xã tơrgùm nàng tam chi nàng tơnơ̆ do làng bol gŏ geh cồng nha he tam chi. Geh tờm chi ƀòn lơgar geh dà ngui sa”.

Tàm dơ̆ lam sồr “Satềp tam chi rài rài kah ưn ngài Bác Hồ” nam 2021, kes priă sền gàr mờ tơnguh bơtàu brê càr Kon Tum neh pà Đảng ủy, gơnoar atbồ bal mờ làng bol kis tàm xã Văn Lem 300 tờm nho 3 nha, tờm neh 2 nam nàng tam jăt gah ală gơl gùng, gùt dar hìu rông tàm ală ƀòn nàng geh ù tiah mờ tiah kis tơlir-kloh-niam. Ală kuang bàng tàm Mpồl lơh broă bơh kes priă kung neh tus bơto sồr làng bol tàm broă tam, sơnkah sền gàr nàng tờm nho geh hòn gơs niam. Bi A Hùng, Chủ tịch UBND xã Văn Lem pà gĭt, bơta kuơ màng ngan là bơh ală broă lơh bè do, jơnau gĭt wă bơh làng bol tàm xã dê tam chi, tam brê mờ sền gàr brê ngai sơlơ geh gơguh uă: “Sùm geh tàm tơngai lài tus tŭ do làng bol kis tàm xã Văn Lem jơh nùs ngan bè broă atbồ sền gàr brê. Kơnòl, rơcang lài ală phan, ală broă lơh gơrềng bal bè broă atbồ sền gàr brê. Sùm sền gròi nàng gĭt bè ală bơta tàm xã gơwèt bơnah brê ƀòn atbồ. Kuơ màng tŭ do geh gùng dà broă lơh bơh càr, kơnhoàl bè tam chi tàm xã Văn Lem den pal đơs là, do là kơnòl kuơ màng ngan bè tam brê tàm dòr bơnơm sar ờ geh chi hòn tàm ù tiah xã Văn Lem. Làng bol kung bè đoàn viên ơruh pơnu kis tàm ală ƀòn jơh nùs ngan bè broă atbồ sền gàr brê kung bè tus bal mờ broă tam brê”.

Dong kờl xã lơh oh mi Văn Lem tàm gah lơh broă tờm, là lơh jăt broă tơm priă broă lơh drơng ala tiah kis brê, pah nam Kes priă sền gàr mờ tơnguh bơtàu brê càr Kon Tum ndrờm crơng gơs Mpồl lơh broă geh Kuang atbồ kes priă lam bồ tus bơto sồr gơnoar atbồ xã sền gròi broă lơh, kĭ rơndăp broă tơmŭt, tă tơm priă sền gàr tiah kis brê; atbồ ngui, ai khà ngui broă tơm priă sền gàr tiah kis brê; lơh sră nggal jào atbồ, sền gàr brê ai hìu làng bol, cau dùl nă să, mpồl bơtiàn làng bol kis tàm ƀòn. Ồng Hồ Thanh Hoàng, Kuang atbồ Kes priă sền gàr mờ tơnguh bơtàu brê càr Kon Tum pà gĭt, bơh broă dong kờl priă, dong kờl broă lơh bơh kes priă dê, broă atbồ, sền gàr brê tàm ù tiah xã lơh oh mi geh lơh niam rơlao. Làng bol gĭt tus mờ bơta kuơ màng mờ bơta geh kuơ mùl màl bơh broă sền gàr, tơnguh bơtàu brê: “Làng bol neh tam gơl jơnau gĭt wă. Lài do làng bol sền gàr brê ờ hềt geh nùs nhơm lơh is. Tŭ do làng bol sền gàr brê là neh geh nùs nhơm lơh is. Làng bol gĭt tus mờ broă sền gàr brê là broă lơh drơng ala. Sền gàr brê là broă lơh ngan nàng geh dờp priă bơh broă lơh drơng ala tiah kis brê uă ngan. Bơh priă tơm sền gàr tiah kis brê neh pơgồp bal tàm broă tơnguh rài kis làng bol in”.

Kung tềng đăp mờ broă bơto sồr, pơlam kỹ thuật bơh Kes priă sền gàr mờ tơnguh bơtàu brê càr Kon Tum, làng bol 4 ƀòn bơh xã Văn Lem, kơnhoàl Đăk Tô neh lơh jăt gùng dà broă dong kờl tam brê lơh sa tàm ù dòr ờ geh chi hòn, ù klàr mờ bă ù ơnàng 123 lồ bơh priă sền gàr drơng ala brê xã dê. Gùng dà broă lơh do geh dong kờl làng bol xã Văn Lem geh tai broă lơh, tơnguh priă geh, pơgồp bal tàm broă tơn jơh jơgloh, tơmù rơƀah mờ geh pơgồp bal tàm broă lơh geh cồng nha jơnau kờñ tam pa 15 rơbô lồ brê mờ Kơrnoăt pơrjum dờng Đảng bộ càr Kon Tum dơ̆ 16 neh geh ai. Bơta chờ rơlao tai là bal mờ broă tam brê, tŭ do jơh 4 ƀòn tàm xã Văn Lem ndrờm neh dờp atbồ sền gàr brê bơh bă brê 5 rơbô lồ geh xã atbồ. Khà priă tơm tàm broă sền gàr tiah kis brê mờ ală mpồl bơtiàn geh pah nam dong kờl làng bol tơnguh rài kis broă lơh samờ geh sùm uă broă lơh geh kuơ nàng mpồl bơtiàn ngai sơlơ tơnguh bơtàu.

Cau cih Khoa Điềm-Cau mblàng Ndong Brawl