VOV4.K’ho- Ală ngai do, ƀòn dờng Buôn Ma Thuột, càr Dăk Lăk sùm git gŏ uă cau bơtờp kòp Covid-19, pal đơs là khà cau geh git gŏ tàm mpồl bơtiàn geh mờr nggùl tàm kờp jơh khà cau bơtờp kòp. Tơrmù ƀà bơta kơn jơ̆ ai ală anih tam cah is tơrgùm bal mờ ală hìu sơnơm sơm cau kòp Covid-19 in, ƀòn dờng Buôn Ma Thuột neh tam cah is F1 tàm hìu mờ gam rơcang ală rơndap broă sơm F0 tàm hìu. Mìng kờp is bơh bồ nhai 11 tus tŭ do, ƀòn dờng Buôn Ma Thuột neh git gŏ 500 nă cau bơtờp kòp Covid-19, tàm hơ̆ geh 200 nă cau geh git gŏ tàm mpồl bơtiàn.

Tàm ngai 08/11, ƀòn dờng Buôn Ma Thuột git gŏ khà cau bơtờp kòp uă ngan bal mờ 123 nă, tàm hơ̆ geh 81 nă cau kòp tàm mpồl bơtiàn, tơnguh khà cau kòp Covid-19 tàm ƀòn dờng Buôn Ma Thuột tus 1 rbô 359 nă. Tềng đap bơta gơguh uă bè khà cau bơtờp kòp, ƀòn dờng Buôn Ma Thuột neh ai tơlik broă rơndap lơh tam cah is tàm hìu ală cau F1 geh tơl bơta tam cah is tàm hìu jat jơnau sồr bơh Bộ Y tế dê. Tŭ do neh geh rlau 50 nă cau F1 gam geh tam cah is tàm hìu. Tàm ngai 08/11, kờp bal gùt càr Dăk Lăk git gŏ geh 287 nă cau bơtờp kòp Covid-19, tàm hơ̆ geh 127 nă cau kòp tàm mpồl bơtiàn. Do là ngai geh khà cau bơtờp kòp uă ngan rlau jơh bơh lài tus tŭ do.

Cau mblàng K’Duẩn