VOV4.K’ho - Chính phủ pa tơlik Nghị quyết sồ 68 bè ờ uă broă dong kờl cau lơh broă mờ ngui cau lơh broă gơtìp kal ke tài bơh kòp Covid-19 mờ khà 26 rơbô tơmàn đong. Tàm bơta kòp gơtìp ngai sơlơ kal ke, khà priă dong kờl do geh uă jơnau kơ̆p kờñ geh dong kờl mpồl lơh sa kă bro, cau lơh broă sơrlèt mờ kal ke. Mơya, uă cau ờ sŭk, mờ bơta geh lơh ƀuơn rơlao, ƀuơn tìp rơlao mờ khà priă dong kờl lài, den khà priă dong kờl do geh bơcri bè jơnau kơ̆p kờñ lah ờ?

              Ồng Phạm Quang Tú, Phó kuang atbồ dà lơgar mpồl Oxfam tàm lơgar Việt Nam

-Ơ ồng, pa do, Chính phủ pa tơlĭk Nghị quyết sồ 68 bè ờ uă broă dong kờl cau lơh broă mờ ngui cau lơh broă gơtìp kal ke tài bơh kòp Covid-19 mờ khà 26 rbô tơmàn đong, geh 12 tơngu me mờ mpồl cau geh dờp bơh broă dong kờl do. Ồng đơs bè lơi bè khà priă dong kờl do.

Ồng Phạm Quang Tú: Lài ngan, Mpồl Oxfam pơn jờng lơgar Việt Nam pơn jăt tai lơh jăt khà priă dong kờl dơ̆ bàr gơwèt mờ ală cau là cau lơh broă mờ mpồl lơh sa kă bro gơtìp aniai bơh kòp Covid-19. Bơta do tơlĭk broă dong kờl niam bơnĕ ngan bơh Chính phủ lơgar Việt Nam dê pơn jăt tai dong kờl ală cau gơtìp bơh kòp gơtờp mờ jơnau geh ai là “Ờ geh cau lơi gơtìp sơbì is hờ tơnơ̆”. Bol añ neh đơs niam cau geh dờp bơh broă dong kờl do geh pờ ơnàng mờ kuơ màng ngan Chính phủ neh ai mpồl cau lơh broă-Cau ling sồt să mờ Mpồl bơtiàn den cau do ờ di là cau geh ai tơmŭt tàm jơnau kờp dŭ lài ngan. Do là cau bơh broă sền gròi mờ kơlôi sơnơng bơh bol añ dê, do là cau gơtìp aniai mờ hoàc huơr uă ngan. Den tàng broă Chính phủ neh ai mpồl cau do tàm khà geh dờp bơta kuơ là kơrnoăt di pal ngan mờ jờng rơ ngan.

-Bè hơ̆, jăt ồng, broă ai ală cau kờñ geh dong kờl dơ̆ bàr pal geh lơh bè lơi nàng jơh ală cau tơl bơta ndrờm geh tìp mhar ngan, buơn ngan bè tơngu me kơrnoăt neh ai?

Ồng Phạm Quang Tú: “Nghị quyết sồ 68 neh cih loh ală cau bloh, mơya gam geh ờ uă cau tai mờ jăt bol añ là ờ hềt geh, tàm hơ̆ geh tàm nghị quyết do. Bè làng bol lơh broă sa mờ gơtìp aniai bơh kòp Covid-19 tài gơtìp ờ pràn ha là kơrian tàm ală tiah gơtìp kòp gơtờp, phan geh lơh bơh broă lơh sa suơn sre làng bol dê ờ geh blơi ha là blơi mờ khà priă ờ kas rơlao mờ khà priă tàm drà kă bro ha là ờ uă rơlao mờ khà priă lơh sa bơh cau lơh broă sa dê, hơ̆ kung là cau kờñ geh dong kờl. Mơya, jăt nghị quyết sồ 68 geh cih, tus tŭ do, ală cau neh geh ai mờ geh lơh bè lơi nàng he ai di ală cau geh cih tàm nghị quyết do. Añ kơlôi là ală mpồl lơh sa kă bro gơtìp aniai, cau lơh broă geh lơh broă bal gơtìp roh broă lơh ha là gơtìp koh gơl broă lơh den añ kơlôi là ƀuơn ngan nàng ai geh tài do là mpồl cau geh cih măt bè mpồl lơh sa kă bro geh dan cih măt kă bro, geh tơl pràn nàng sền gĭt bè bơta hoàc huơr làng bol dê. Mơya, broă kuơ màng ngan là cau lơh broă khăt gơboh den loh làng pal geh lơh niam broă rơwah bơta geh kung bè broă geh ai mpồl gơwèt mờ cau do. Tài jơnau bơsram broă mờng chài bơh khà priă dong kờl dơ̆ sơnrờp, uă ngan cau lơh broă khăt gơboh, cau lơh broă ờ mùl màl tơl bơta nàng geh dờp bơta kuơ bơh khà priă dong kờl, mơya tài sră nggal lơh cơng bơta geh bơh să tờm, cau geh đơs niam pal geh dờp mơya ờ geh dờp”.

-Jăt jơnau cih tàm Nghị quyết sồ 68, cau lơh broă khăt gơboh geh tơl càr, ƀòn dờng lơh jăt di mờ kes priă càr, ƀòn dờng mờ khà dong kờl ờ uă rơlao 1 tơlăk đong tàm 1 nă. Bơta do geh di pal lah ờ, ơ ồng?

Ồng Phạm Quang Tú: “Bè khà priă dong kờl, añ gŏ ờ uă ngan. Mùl màl, tàm dơ̆ dong kờl lài ngan, khà priă uă rơlao, di gơlan là bơh 1 tơlăk 500 rơbô đong tus 2 tơlăk đong, mơya tài sră nggal kal ke ir, bal mờ khà priă dong kờl ờ uă den tàng geh uă cau lơh broă ờ jào sră tài khà priă hơ̆ ờ di pal ha là ờ uă nàng dong kờl hìu nhă làng bol mờ pơn drờm mờ khà priă tă bè tơngai lơh sră nggal, sră nggal uă ir den tàng làng bol ờ bài jào sră tai. Hơ̆ là tơngu me tờm tài bè lơi khà priă dong kờl lài ngan gơwèt mờ cau lơh broă ntrờn, khà priă dong kờl mờ bơcri geh ờ uă. Di lah mìng geh gơrềng bal là geh dong kờl den geh ƀuơn rơlao mờ niam bơnĕ rơlao. Bè hơ̆, gơnoar atbồ ală càr, ƀòn dờng bal mờ ală anih lơh broă tờm dờp kơnòl lơh jăt broă lơh do kung pin dờn rơlao tàm broă lơh jăt. Tài bè broă mờng chài pà gŏ, tàm broă lơh jăt khà priă dong kờl dơ̆ sơrnờp, uă kuang bàng, gơnoar atbồ tàm ală tiah bal mờ anih lơh broă tờm drơng broă do ờ sŭk ngan bè kơnòl geh ai di ha là ờ di cau”.

-Cau geh pờ ơnàng kung geh bal ală jơnau ờ sŭk bè broă gơtìp cau sơgràm lơh geh kuơ is, jăt ồng pal geh broă lơh lơi nàng tơmù bơta do?

Ồng Phạm Quang Tú: “Kờñ tơmù ờ uă ngan broă do, jơnau kờñ pơgồp sơnrờp ngan là broă lơh bal ală gah lơh broă, lơh broă jăt broă lơh mpồl lơh broă bè UBND xã, sơnah ƀòn, mpồl lơh broă, mặt trận dà lơgar, mpồl atbồ ƀòn. Hơ̆ là pal lơh broă bal, tàm pơn drờm bal jơnau tơngĭt mờ dờp jơnau tơngĭt bơh ală anih lơh broă gơrềng bal dờp kơnòl krơi is. Bè tàm broă lơh lài ngan geh lơh gơmù uă ngan rềs àr là broă sơgràm bơh cau dùl nă să ha là mpồl lơh broă lơi. Tài tŭ he jào dùl nă cau in ha là dùl mpồl lơh broă, di lah ờ geh broă sền gròi, tus bal gròi sền bơh mpồl lơh broă ndai den ờ geh cồng nha mờ bơta sơgràm geh kuơ is là uă ngan. Gơwèt mờ cau lơh broă ntrờn, pal sền gròi sơlơ̆u bal jơnau tơngĭt bơh ală tiah geh cau lơh broă lòt mờ tiah geh cau lơh broă tus, mờ broă lơh do geh lơh jơnau tơngĭt he dê dùl dơ̆ tai geh sền gròi sơlơ̆u bal, broă di gơlan gơtìp ndrờm bal mờ sơgràm bơta kuơ dơ̆ bàr geh gơmù. Bơta kuơ màng tai là Bộ Lao động-Thương binh mờ Xã hội pal bơ̆t bơtàu cơ sở dữ liệu tàm internet, kờp jăt tơngai lơh jăt, hơ̆ là tŭ geh ală cau lơh broă lơi dan cih măt dờp dong kờl bơh khà priă do, den jơnau tơngĭt cau hơ̆ geh gơlĭk tơn tàm internet. Bè hơ̆, he geh kơrian ală cau sơgràm mờ broă lơh ờ nền nòn nàng geh kuơ is.

-Ơi, dan ưn ngài ồng!

Cau mblàng Ndong Brawl