VOV4.K’ho - Bi Y Pôt Niê, deh nam 1988, là kuang atbồ kông ty TNHH Êđê Café, tàm ƀòn Kla, xã Drai Săp, kơnhoàl Krông Ana, càr Dăk Lăk. Kông ty TNHH Êđê Café neh dờp geh khà “Mpồl 10 khà măt kă bro geh pơnrơ ngan nam 2019”. Tàm bơta kòp Kovid-19 gơtờp, mơya Êđe Café gam lơh ngan gơdờp mờ bơta pa. Tŭ do, uă cau bơh lơgar bơdìh lơh broă bal, ai khà măt kă bro Êđe Café tus tàm drà kă bro dunia. Bi Y Pôt Niê yal bè ală broă lơh bơh mpồl lơh sa kă bro bơh dơ̆ lùp tơnơ̆ do.

Ơ bi! Tàm bơta kòp Kovid-19 gơtìp kal ke, kông ty Êđê Café neh gơdờp bè lơi?

Bi Y Pôt Niê: “Tàm nam 2019, rơ̆p crơng gơs mơya bơta kuơ bơh bol añ dê geh di pơgăp 900 tơlăk đong, tus nam 2020 di pơgăp 1 tơmàn đong. Tus nam do priă geh bol añ dê gơmù uă ngan, ờ tus 500 tơlăk đong sơl. Lài jơh, he gŏ kòp Kovid-19 lơh gơrềng tus jơh ală bơta tàm rài kis, ờ mìng ală hìu lơh sa. Kòp gơtờp lơh aniai tus uă ngan mờ kông ty kă bro, ờ mìng bol añ. Mơya ờ mìng bè hơ̆ mờ he ơm. Bol añ sơlơ lơh ngan rơlao tai.

                                          Bi Y Pôt Niê ntào tềng gah măi coh kơphe

Gam gơwèt mờ kông ty bol añ tài ală rơndeh pơn diang mờ bưu điện kung ơm ờ lơh broă. Bol añ tơrgùm tàm broă tăc tàm internet mờ bơh Tiki mờ Shopee, livestream tàm facebook, Zalo. Ală cau blơi geh tàm gùt tiah kung hòi điện thoại bol añ in nàng blơi tai phan bơh Êđê’s Café. Bol añ cri bơyai mờ bưu điện mờ geh pơyoa 5 kĭ pah dơ̆ pơyoa. Ờ gơtùi pơyoa bè lài mờ kòp gơtờp. Bol añ sùm tăc bè hơ̆. Pah ngai tăc geh di pơgăp bơh 30 tus 50 kĭ rơlao hờ đang”.

Ơi! Kòp Kovid-19 lơh gơrềng tus mờ broă lơh sa bal, mơya tàm bơta hơ̆, Êđê kơphe neh ai geh ờ uă bơta phan pa bè kơphe sầu riêng, kơphe bùm trao. Bơta lơi neh cèng tus nàng bi lơh geh ală bơta phan do?

Bi Y Pôt Niê: “Mùl màl, añ kờñ lơh gơs kơphe mix kơphe mờ ală bơta do neh jŏ ngan. Di gơlan là tài añ là cau Rơđê gam kơnòm, pràn kơl dang den tàng neh lơh kông ty dùl nă să is. Añ chờ ngan mờ kờñ cau kơnòm să pơnyờ să mờ bơsram bal, tơnguh bơtàu rơlao tai, añ gŏ mpồl bơtiàn he gam ờ tơl uă bè jơnau ngăc ngar tàm rài kis, bơsram sră...

                      Nam 2022, Êđê Café lơh ngan pơn jăt tai tăc phan geh lơh mờ lơgar bơdìh

Dơ̆ bàr, añ gŏ uă cau dờng sơnam hùc dà kơphe ù bè ờs, dà kơphe hùc bè hơ̆ bơkah ngan, mơya lơh gơrềng tus mờ bơta pràn kơl dang să jan bè huyết áp gơguh. Den tàng añ kờñ lơh geh kơphe di pal mờ bơta pràn kơl dang să jan cau dờng sơnam in, añ pic plai sầu riêng tơrlòng pơr mờ klài bal mơù kơphe den bơkah ngan. Añ ai kơphe Robusta klài bal mờ ờ uă sầu riêng, sơdàng, dà toh, jăt dùl bơta lơh gơs is. Tus tŭ do neh gơs dùl bơta phan is geh drà kă bro kờñ uă ngan. Añ gŏ chờ hờp ngan bè bơta do”.

Bơta lơi dong kờl bi sùm pin dờn sơrlèt mờ ală kal ke nàng lơh geh cồng nha?

Bi Y Pôt Niê: “He ờ git lài ngai hìng bè lơi. Mơya Êđê kơphe bol añ dê sùm geh lơh ngan gơdờp bal tàm ală bơta. Lơh ngan bơsram, jòi, geh ală jơnau bơceh lơh pa, bơceh pa geh ală phan pa nàng tăc tàm drà kă bro nàng hòi jà cau ngui sa pin dờn mờ ngui phan geh lơh bơh kông ty añ dê. Êđê kơphe pa crơng gơs mơya gam lơh ngan tàm ală broă lơh, tàm broă lơh ngan geh bơta cồng nha, bơta cồng nha cèng geh bơta niam bơnĕ, hơ̆ là cồng nha niam bơnĕ ngan bơh kông ty bol añ dê.

Tŭ añ pa crơng gơs, làng bol tàm ƀòn lòt lơh broă tàm càr Bình Dương mờ ală ƀòn dờng ndai uă ngan. Mơya tŭ kòp gơtờp, ală cau hơ̆ rê mờ ƀòn lơgar, añ pơn jăt tai ai tơl bơta niam nàng ală cau in geh broă lơh. Tŭ do neh geh 10 nă cau tàm ƀòn Kla mŭt lơh broă mùl màl mờ Êđê kơphe. Bơdìh hơ̆ tai, gam geh ală cau lơh broă jăt tơngai, pic plai kơphe ha là sền gàr, sơnka kơphe kung geh bơh 20 tus 30 nă cau. Añ ơpah 200 rơbô đong 1 nă 1 ngai. Bol añ sùm chờ gờm làng bol mŭt lơh broă bal nàng geh priă tai”.

Tàm tơngai tus, bi geh ală jơnau rơcang lơi, rơndăp broă lơh bè lơi nàng tơnguh bơtàu Êđê Café lah ờ?

Bi Y Pôt Niê: “Bơh tŭ do, añ neh geh ală rơndăp broă loh làng tàm nam 2022. Tơngu me tờm bơh añ dê là tăc tus ală lơgar ndai. Añ neh dan tus bal mờ ală broă lơh Amzon, Alibaba. Hơ̆ là dùl tàm ală gah tăc phan mờ lơgar bơdìh dờng ngan tàm dunia. Añ neh dan cih măt tus bal mờ hơ geh tăc tus ală lơgar ndai tàm dunia tàm broă lơh Amazon mờ Alibaba tàm 1 nam ờ uă ngan là 10 tấn kơphe ƀòk. Tŭ tus bal ală broă lơh do añ geh tai broă bơsram bal broă mờng chài là bơta kuơ màng ngan.

Añ lơh jơh ală broă mờ broă lơh ngan sùm, ờ geh ơm. Tàm nam pa, añ kơ̆p kờñ jơh ală cau geh lơh broă bal mờ añ tàm kông ty mờ jơh ală làng bol kis tàm ƀòn sùm pràn kơl. Tàm bơta kòp gơtờp pal git sền gàr să tờm bal mờ mpồl bơtiàn. Să tờm añ geh lơh ală rơndăp broă lơh làng rơlao tai nàng geh jăt mờ jơnau kờñ tăc mờ lơgar bơdìh. Bol añ lơh broă tàm nùs nhơm chờ hờp. Kơ̆p kờñ tàm nam pa geh tơnguh bơtàu mờ pờ ơnàng hìu lơh broă, phan lơh broă, geh uă cau tàm lơgar, lơgar bơdìh tus blơi kơphe, nàng dong kờl làng bol tàm ƀòn do geh tai priă”.

Ơi, dan ưn ngài bi!

Cau cih H’ Zăwut-cau mblàng Ndong Brawl