VOV4.K’ho – Tơnơ\ 6 nam crơng gơs Mpồl lơh broă niam dong kờl is “Guàng tê kờ` gơboh”, bi Nguyễn Duy Học (gơtìp kuet kơlte tài bơh sơnơm khih điôxin lơh aniai) ơm tàm xã Ea Kly, kơnhoàl Krông Pach, càr Daklak neh lam sồr, hòi jà tă pơgồp geh rlau 1 tơmàn 200 tơlak priă, bal mờ rlau 1 rbô nă cau lơh broă dong kờl is tus bal, dong kờl uă ngan kơnòm dềt geh rài kis kal ke tàm tiah sar lơgar ngài. Cau ai tơnggit jơnau đơs VN tàm Tây Nguyên geh lùp bi bè ală broă lơh geh kuơ do:

Ơ bi Nguyễn Duy Học, geh git nhai rlô bơkang do, Mpồl lơh broă niam dong kờl is “Guàng tê kờ` gơboh” gam mut lơh uă broă lơh ngan ngồn wèt tus kơnòm dềt tiah sar lơgar ngài bơh càr Daklak dê. Bi gơtùi pà git bè jơnau yal do sơl?

Bi Nguyễn Duy Học: Tàm dùl nam, sùm tàm 9 nhai bơsram, mpồl sùm bơyai lơh ală broă lơh bè pà phan ngui bơsram, àu kò ală oh in, pà priă dong kờl bơsram, pà rơndeh coh. Mpồl gam bơyai lơh tai ală broă lơh di ngai Dunia kơnòm dềt, sa tềp bơhìan lơgar he dê, sa tềp trung thu nàng wèt tus kơnòm dềt r[ah. Tàm nhai rlô bơkang do den mpồl gam geh broă rơndap lơh niam wơl anih ơm ngai hìu bơsram Tô Hiệu tàm xã Cư San, kơnhoàl M’Drak, tàm do geh rlau 250 nă kơnòm bơsram ơm ngài mờ hìu bơsram tus 20 kơi sồ. Ală oh hơ\ ơm wơl hìu bơsram, dùl nhai hơ\ sồng rê tàm hìu dùl dơ\. Priă nàng lơh niam wơl anih ơm ngai hơ\ là mờr 70 tơlak. Bồ nhai 8 tus do, mpồl geh bơyai lơh pà phan ngui bơsram, mpha tơlir àu kò ai ală oh dềt tàm tiah sar lơgar ngài in rơcang mut tus nam bơsram pa.

Bi Nguyễn Duy Học

Bơh lài tus tu\ do, Mpồl neh mut lơh uă ngan broă geh kuơ ngan ngồn. Mùl màl hơ\ là ală broă lơi, ơ bi?

Bi Nguyễn Duy Học: Ală broă lơh dờng hơ\ là tơr lung dà khoàng mờ mai\ jồr dà ai ală kơnòm bơsram tàm hìu bơsram kấp 1 Lê Quý Đôn, hìu bơsram [òn 9, xã Cư Roá, kơnhoàl M’Drak, priă tă lơh rlau 70 tơlak, là broă lơh dờng ngan rlau jơh ai kơnòm bơsram in. Dơ\ càl rbut dờng dà ko\ dà cò lơh aniai tàm lồi nam 2017 den lơh hìu ală kơnòm bơsram tàm xã Yang Mao mờ xã Cư Pui, kơnhoàl Krông Bông. Ai ală kơnòm bơsram geh dờp priă dong kờl bơsram den ală nam bơsram ndrờm là kơnòm bơsram jak, cồng nha bơsram jak ngan. Pơn yơu bè oh Ngọc Thị Hồng Nhung, digơlan pal sang bơsram tài hìu bơnhă r[ah, den mpồl kung dong kờl oh in lòt bơsram. Nam do oh neh guh ơdu\ 12, 2 nam sùm oh ndrờm là kơnòm bơsram jak.

Nguyễn Duy Học pà phan kơnòm dềt tiah kal ke in

Ơ bi, mờ uă ngan broă lơh geh lam lơh sùm pah nam, tàm hơ\ geh ală broă lơh dờng. Bè hơ\ priă tă lơh mờ cau lơh broă geh lam sồr mờ hòi jà bè lơi?

Bi Nguyễn Duy Học: Priă tă lơh den bol oh hòi jà bơh cau geh nùs nhơm niam. Tơnơ\ 6 nam lơh broă, neh hòi jà tă pơgồp geh rlau 1 tơmàn 200 tơlak. Bơdĩh mờ càr Daklak, gam geh cau geh nùs nhơm niam tàm ală càr, [òn dờng tàm gùt lơgar. Khà cau lơh broă dong kờl is tus bal tàm mpồl tus tu\ do là rlau 1 rbô nă. Tơnơ\ tơl broă lơh mờ pah nhai, den oh yal loh làng khà priă bơh cau geh nùs nhơm niam dong kờl, priă tă pơgồp, priă tă dơ\ ngui, pờ tơlik tàm facebook bơh mpồl dê, nàng yal loh làng tơl nă cau in git. Ală bơyô lơh broă niam dong kờl is den tus bal jơh nùs ngan, nùs nhơm geh kơnòl uă ngan. Bu\lah geh ală broă lơh lòt ngài tus git nđờ rhiang kơi sồ, ală bơyô ndrờm tă is priă blơi xăng rơndeh, sàu sa tàm gùng.

Mpồl guàng tê kò` gơboh pà phan kơnòm dềt tiah dà ko\ dà cò lơh aniai in

Là cau kuet kơlte, să tờm bi neh kơlôi rơcang is rài kis bè lơi nàng geh tu\ tơngai lơh broă dong kờl is?

Bi Nguyễn Duy Học: Rài kis den pah ngai ơm tàm hìu tac dà hùc, kơphe, trà sữa kơnòm bơsram in, kung tơl priă tuh xăng nàng lòt lơh broă dong kờl is, kung tơl priă nàng kơlôi rơcang rài kis he in. Oh kung blơi uă mai\ quay lơma, cùp rùp; kung roh bơh 30 tus 40 tơlak nàng cùp wơl rùp ală bơyô lơh broă dong kờl is mờ rài kis kal ke bơh ală kơnòm bơsram tàm tiah sar lơgar ngài dê. Lòt rê den ngài, rơndeh rơn dồ uă ngan là ngui rơndeh mai\. Bơh hìu mờ lòt tus Ea Súp mờr 150 kơi sồ, đì rơndeh kung lơ gah tê ngan; gùng lòt bo\ lơm bè, rơndeh ờ niam là jơnau sùm gơbàn, gơ pừ kung geh sơl, gơtìp làk rơndeh 2, 3 dơ\ bloh.

Dan ưn ngài bi!

             Cau mblàng K’Duẩn