VOV4.K’ho- Drim ngai 16/11, tàm Hà Nội geh lơh Cribơyai Priă jền lơgar Việt Nam nam 2021 mờ tơngume “Broă rơndap lơh priă jền tơngai bơh nam 2021 tus nam 2030 mờ ală broă lơh bơtàu tơnguh wơl, bơtàu tơnguh lơh sa Việt Nam”. Mut lơh cribơyai, Thứ trưởng Bộ Tài chính ồng Võ Thành Hưng đơs nền, tơnơ̆ mờr 10 nam lam lơh jat Broă rơndap lơh priă jền tus nam 2020, rài priă jền dà lơgar dê neh geh ală tam gơl loh làng mờ lơh geh uă cồng nha niam. Bulah bè hơ̆, Việt Nam kung gam pal kong mờ 2, 3 bơta kòl yan bè: ring bal kes priă kal ke, ngan là tàm tŭ tơngai kòp dờng Covid-19; bơta rồn bơklơn gơguh tă dơ̆ ngui kes priă ai ală jơnau kờñ sền gàr rài kis mpồl bơtiàn, sền gàr lơngap lơngai dà lơgar... Den tàng, Thứ trưởng Bộ Tài chính ồng Võ Thành Hưng kơp kơnờm, ală jơnau dan bơh ală cau jak chài tàm lơgar mờ dunia dê geh dong bơt bơtàu ală broă lơh tam gơl pa tàm broă lam lơh rơndap broă lơh priă jền dà lơgar tơngai bơh nam 2021 tus nam 2030, lơh sir ală broă lơh priă jền- kes priă dong bơtàu tơnguh wơl lơh sa Việt Nam tàm tơngai tus.

Cau mblàng K’Duẩn