VOV4.K’ho - Drim òr (06/09), UBND càr Kon Tum bơyai lơh pơrjum ai Mpồl kuang bàng lơh sơnơm bơh càr dê tus bal mờ broă rơcang sơndră mờ kòp Covid-19 tàm càr Bình Dương.

                   Kuang đơng lam càr Kon Tum pà phan, kŭp rùp lời kir mờ mpồl lòt lơh broă

        Dơ̆ tàm tơngăc cau pròc mhàm bal mờ cau lơh broă bal bơh 30 nă cau tàm mpồl lòt lơh broă dê

Jăt broă Rơndăp lơh, Mpồl 30 nă bác sỹ, điều dưỡng bơh càr Kon Tum geh lơh jăt kơnòl tàm càr Bình Dương tàm 30 ngai. Lài mờ tŭ lòt gùng, ală cau tàm mpồl lơh broă do neh tus bal mờ ơdŭ bơsram 6 ngai geh Sở Y tế càr Kon Tum bơyai lơh, tơrgùm tàm gah sền nàng git mờ sơm kòp; kỹ thuật ai mẫu, lơh jăt broă xét nghiệm virus Sars CoV-2 mờ kỹ thuật Realtime PT- PCR. Đơs tàm dơ̆ lam sồr ală bác sỹ, điều dưỡng tàm càr lài mờ tŭ lòt, ồng Lê Ngọc Tuấn, Chủ tịch UBND càr Kon Tum kơ̆p kờñ: ală kuang bàng tàm mpồl lơh broă geh tơnguh uă ngan nùs nhơm tam klăc bal, geh kơnòl, tơmù ală kal ke tàm broă lơh jăt kơnòl, gàr niam bơta pràn kơl dang să jan mờ gàr niam ờ do ờ dă să tờm. Nàng lam sồr nùs nhơm, dong kờl Mpồl kuang bàng lơh broă tàm broă lơh jăt kơnòl tàm càr Bình Dương, UBND càr Kon Tum, Sở Y tế, Liên đoàn Lao động càr, Công ty Cổ phần sâm Ngọc Linh Kon Tum neh pà ală cau bal mờ mpồl lơh broă kờp jơh geh 285 tơlăk đong.

Cau mblàng Ndong Brawl