Trồ tiah tàm càr Kon Tum kung gam duh rơ ồl bè ală ngai bồ nhai 4, mơya broă lơh bơh mpồl lòt sền làm gah, tàm hơ\ geh mpồl cảnh sát gùng lòt mờ lùp sền gùng lòt càr Kon Tum tàm hìu kân kùel Sao Mai gùng rơndeh 14, gơl di ntum Hòa Bình, bòn dờng Kon Tum tàm ală ngai do neh ờ uă ngan tai. Ờ gam bơta 1 mpồl rơndeh pơndiang kơn jơ\ ir ơm tềng đăp hìu kơng mờ ờ bài lòt tềng mai\ kơng, mờ sơ lơ ờ geh bơta cau mai\ rơndeh bal mờ khà uă tơr gùm gùt dar nàng kờ` lơh gơbàn bơta rồn bơ klơn tus mờ mpồl lơh broă geh gơnoar. Geh lơh  ngềt ngơt mờ di jat jơnau pơlam, tu\ do den pah tu\ geh tềl bơh mpồl lơh broă geh gơnoar sồr sền gròi khà kơn jơ\ phan pơndiang, cau mai\ rơndeh ndrờm lơh jat is. Bi Nguyễn Văn Sơn mai\ rơndeh dờng pơndiang phan geh bàng sồ 81M – 1623 pa mut lơh jơh broă kâng kơn jơ\ rơndeh chờ hờp yal:“ Bơh ngai geh kơrnuat kân bè do, den a` pơndiang phan di mờ khà geh ai. He pơndiang kơn jơ\ ir đơs bal là khà lơh glài uă ngan. Bơta do lơh aniai tus priă jền lơh geh he dê, mờ gam gơ rềng tus ờ do ờ dă. Đơs bal den he lơh jat kơrnuat boh lam là niam rlau jơh.”

Bơta buơn ngan sền go\ bè broă lơh geh cồng nha bơh ală hìu kơng kơn jơ\ rơndeh geh gah lơh broă geh gơnoar càr Kon Tum crơng gơs tàm 2 gùng rơndeh là gùng 14 mờ gùng 40, hơ\ là ală bơta rơndeh sùm pơndiang kơn jơ\ ir, bè rơndeh pơndiang dơm chi, pơndiang phan lơh gơs bơh suơn sre, phan ngui bơt bơtàu…ờ gam tràl sơ bil bè lài do tai, mờ bơta do neh geh làng bol sền go\. Bi Võ Tuấn Anh dùl nă cau lơh broă còr gùng tam cah gùng lòt đăng gờl sùm lơh broă tàm gùng rơndeh 14 pà git:“ Bơh tu\ geh kơrnuat tơmù khà kơn jơ\ rơndeh den a` go\ rơndeh rơndồ lòt rê niam ngan. Bơh lơgar Lào pơndiang dơm chi lài do den pơndiang ờm lơm, mơya tu\ do den lòt gan neh tơmù khà kơn jơ\ uă ngan. Đơs bal lơh bè do den gùng ờ huan gơtìp aniai.”

Lơh bơ song ală bơta ờ hềt niam bơh sơn rờp, broă sền gròi khà kơn jơh rơndeh tàm 2 poh pa do neh geh mpồl cảnh sát gùng lòt mờ lùp sền gùng lòt càr Kon Tum mut lơh pràn ngan. Kờp bơh ngai 1 tus ngai 20/4, 3 hìu kơng mờ mai\ sền khà kơn jơ\ rơndeh bơh càr dê neh sền gròi geh 719 nơm rơndeh, git go\ lơh glài 32 dơ\ rơndeh pơndiang kơn jơ\ ir mờ khà geh ai, mơkung pơlam sồr mờr 230 nơm rơndeh, uă ngan là rơndeh pơndiang dơm chi bơh lơgar Lào tơmù mơ khà kơn jơ\ tàm mpồng nhàr lơgar dunia Bờ Y lài mờ tu\ lòt tàm ală gơl gùng mut tàm càr. Ồng Nguyễn Mạnh Tuấn kuang atbồ mpồl lùp sền di gah gùng lòt mờ pơndiang phan càr Kon Tum pà git:“ Cồng nha lơh geh niam ngan. Tu\ do rơndeh pơndiang kơnjơ\ ir neh gơmù uă ngan. Rơndeh pơndiang dơm chi den tu\ do kung ờ gam tai. Ờ uă bơta rơndeh ndai bè rơndeh pơndiang bùm blàng den lài do pơndiang uă ngan, kơn jơ\ ir, mơya tu\ do den jơh ală ndrờm pơndiang di khà kơn jơ\ geh ai. Hala rơndeh pơndiang bràs lài do pơndiang uă ir tu\ do kung neh tơmù tàm khà kơn jơ\ geh ai.”

Bal mờ broă kâng khà kơn jơ\ sền go\ lơh glài broă lơh tìs, nàng bơ song jơh bơta cau mai\ rơndeh lơh tìs khà kơn jơ\ phan pơndiang, mpồl lơh broă geh gơnuar càr Kon Tum neh pơyua sră nggal pơlam tus mờ jơh ală mpồl lơh sa kă bro lơh broă tàm gah pơndiang phan, bơyai lơh pơlam mùl màl cau mai\ rơndeh pơndiang dơm chi in, bơta chài git kờp du\ khà kơn jơ\ nàng pleh pơndiang kơn jơ\ ir. Bal mờ hơ\ gam pơ gồp bal mờ gah lơh bau\, anih yal jơnau tơngit tàm bòn lơgar sơ lơ mblàng yal, kờ` tơnguh bơta git wă lơh jat adat gùng lòt  tus mờ cau mai\ rơndeh mờ cau tờm rơndeh. Thiếu tá Lê Xuân Thủy kuang jat jơng atbồ cơldu\ cảnh sát gùng lòt kuang àng càr Kon Tum pà git:“ Bol a` tơr gùm mblàng yal tus mờ cau mai\ rơndeh, mpồl lơh sa kă bro pơndiang phan mờ ală cau tờm phan bơna, lơh bè lơi nàng tơnguh jơnhua bơta git wă ală cau mai\ rơndeh, mpồl lơh sa kă bro tàm tu\ lòt tàm gùng. Bal mờ hơ\ den bol a` sơ lơ pơ gồp bal mờ ală mpồl lơh broă geh gơnuar ndai. Sơ lơ lòt sền, sền gròi, lơh glài cau lơh tìs.”

Tơ nơ\ 3 poh mut lơh broă sền gròi khà kơn jơ\ rơndeh, bơta ngap lơngai tàm gah gùng lòt tàm càr Kon Tum neh geh bơt bơtàu wơl. Do la tềl tơng go\ chờ hờp ngan mờ neh geh làng bol cih dờp, dùl nùs bal kờ`. Mơya nàng gàr jo\ jòng cồng nha do den càr kung gam geh uă broă pal lơh bè lơh blàng nàng rơndeh ơm, mờ ờ uă bơta kuơ màng ndai lơh tàm ală hìu kâng, broă dong kờl cau lơh kơ nòl broă in, ngan là mpồl lùp sền gùng lòt, tài tu\ do mpồl do ờ hềt geh bơta dong kờl lơi bơdìh mờ priă nhai, bơta ờ ringbal đah ală càr tàm broă sền gròi khà kơn jơ\ rơndeh, broă lơh nàng sền gròi cau mai\ rơndeh mờ cau lơh broă tàm ală hìu kơng. Dilah ờ bơ song 1 bă dipal ală bơta do, den ờ geh cau lơi khin đơs là, broă sền gròi khà kơn jơ\ rơndeh tàm càr Kon Tum đơs is kung bè ală càr đơs bal bè jo\ jòng ờ gơ ơm tàm bơta ờ niam, mờ jơnau gơ lời wơl là ală gơl gùng lòt pơnjat tai gơtìp ờ diơng tài rơndeh pơndiang kơn jơ\ ir mờ mhar ngan gơtìp ờ niam.

                                                                        Cau mblàng K’ Duẩn.