VOV4.K’ho- Tàm khà mờr 357 rơbô cau tĕ khà bơh càr Kon Tum ngai hìng, 23/5 lơh jat gơnoar làng bol, gơnoar lơh tờm bơh he dê bơh sră đùh tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026, geh gĭt nđờ rơbô nă cau tĕ khà là cau mŭt quốc tịch. Ală cau tĕ khà do lài do gơwèt cau mut ơm kis khat gơboh mờ bau mờ ờ geh sră kŭp bau tàm tiah nhàr lơgar Việt Nam mờ Lào geh mŭt quốc tịch Việt Nam jat jơnau ring bal đah Chính phủ 2 lơgar dê.

 Sơlơ mờr tus ngai tĕ khà Kuang bàng Quốc hội khoá 15 mờ Kuang bàng Hội đồng Nhân dân ală kấp tơngai lơh broă bơh nam 2021-2026, ùr bơklau bi A Vơi mờ Y Quên, làng bol kòn cau Jeh -Triêng ơm tàm ƀòn Đăk Si, xã Đăk Dục, kơnhoàl Ngọc Hồi den sơlơ chờ hờp ngan tai. Bal mờ broă pơs wàs hìu đam sàng goh, 2 nă ùr bơklau kung neh cèng bùng bi dà lơgar pơr hê yồng yŭ rơyùm tàm mpồng hìu.

                                           Hìu bi A Vơi mờ Y Quên  yồng bùng bi dà lơgar gờm chờ ngai tĕ kh

Bi Y Quên pà gĭt, 2 nă ùr bơklau ndrờm 27 sơnam, jơh bal 2 nă ùr bơklau geh bèp mờ mè ntrờn tiah ơm kis bơh lơgar Lào mŭt ơm tàm ƀòn Đăk Si ơm kis bơh tàm tŭ dềt. Nam 2012 bơh bơta bơto pơlam bơh gơnoar atbồ mờ gah lơh broă sền gàr adat boh lam tiah do dê jơh bal 2 nă geh mŭt quốc tịch Việt Nam den hơ̆ sồng bau. Ngai tĕ khà 23/5, 2 nă ùr bơklau dơ̆ 2 geh lòt đùh sră lơh jat gơnoar làng bol, gơnoar lơh tờm bơh he dê, gơ lơh chờ hờp mờ pơn iờ să ngan.

Do là dơ̆ 2 añ geh lòt đùh să tĕ khà. Ùr bơklau añ chờ hờp ngan. Tŭ ờ hềt geh mut quốc tịch den tŭ sền gŏ tơl nă cau lòt tĕ khà añ gơ lơh moat jrùm ngan. Ală ngai do, Kuang atbồ thôn mờ Kuang bàng xã kung neh lòt mblàng yal bè Adat tĕ khà, yal tơngĭt cau tơlik mat tĕ khà ai 2 nă ùr bơklau añ in gĭt sơl. Den añ kung tus hìu Rông bơh ƀòn dê nàng gĭt tai jơnau yal tơngĭt. Jơh 2 nă ùr bơklau añ gam kơ̆p gơn ngan tus ngai tĕ khà.

                              Ùr bơklau A Vơi mờ  Y Quên sền jơnau yal tơngĭt bè tĕ khà tàm hìu rông bơh ƀòn dê

Tàm ngai tĕ khà 23/5, xã tiah nhàr lơgar Đăk Dục, kơnhoàl Ngọc Hồi, càr Kon Tum geh kờp jơh 410 nă cau tĕ khà là cau geh mut quốc tịch Việt Nam bơh nam 2009 tus nam 2020. Ală cau tĕ khà do tơrgùm ơm tàm 2 ƀòn Đăk Si mờ Đăk Răng. Ồng Bloong Keo, dùl nă làng bol ƀòn Đăk Si pà gĭt, jơh làng bol geh mŭt quốc tịch Việt Nam tŭ do ndrờm neh geh rài kis kơ̆ kơljap, lòt tĕ khà là dùl broă geh làng bol sền gĭt là kuơ màng ngan nàng tơngŏ kơnòl broă bơh he dê gơwèt mờ ƀòn lơgar Việt Nam.

Lài ngan là Đảng, Dà lơgar neh sền gròi rơndap tap sèng tiah ơm, tiah sa ai làng bol in bè ờs rài kis. Làng bol lơh ngan lơh broă sa. Tŭ  hơ̆ hìu sŭt hìu sềt lơm ờ gŏ geh hìu dờng niam bè do ờ. Làng bol ơm kis tàm do lơh niam ngan broă lơh sền gàr bơta lơngap lơngai mờ rơndap tap sèng. Ală gùng dà  broă lơh bơh Đảng, adat boh lam dà lơgar làng bol ndrờm lơh jat niam. Làng bol geh mŭt quốc tịch Việt Nam, rcang ià pồđùh lòt đùh sră.

Ồng Phạm Hải Châu, Phó Bí thư thường trực Huyện ủy, Chủ tịch HĐND kơnhoàl, Chủ tịch Ủy ban tĕ khà kơnhoàl Ngọc Hồi, càr Kon Tum pà gĭt, nàng dong ală cau tĕ khà là cau mŭt quốc tịch gĭt wă tơl làm gơnoar, kơnòl tĕ khà bơh he dê, gơnoar atbồ bal mờ ală mpồl cau bơh kơnhoàl bơh nam 2021 tus tŭ do neh lơh jat niam ngan broă lơh mblàng yal mờ jơnau đơs “Tus tơl nơm hìu, tìp tơl nă cau”. Kơnhoàl neh lơh jat dơ̆ mblàng yal uă ngan bè tĕ khà, tàm hơ̆ kuơ màng ngan sền gròi tus cau tĕ khà pa mŭt quốc tịch.

Cau lơh broă mblàng yal mờ mpồl Kuang bàng bơh thôn dê tus tơl nơm hìu bơnhă do nàng mblàng yal mờ jơnau đơs tiah do dê ai làng bol mŭt quốc tịch in wă bè Adat tĕ khà kung bè gơnoar, kơnòl broă bơh làng bol Việt Nam dê tŭ lòt tĕ khà Kuang bàng Quốc hội mờ Kuang bàng Hội đồng Nhân dân ală kấp. Bơh broă mblàng yal ngan ngồn, nền cê mờ rùp hìn, mblàng yal làng bol in wă mờ chờ hờp ngan, pin dờn tàm bơta đơng lam bơh Đảng dê lơh jat niam gơnoar tĕ khà bơh he dê.

 Cau cih Khoa Điềm- Cau mblàng K’ Hạnh