VOV4.K’ho- Mho ngai 29/7, Mpồl đơng lam rơcăng sơndră kòp Covid-19 càr Kon Tum geh jơnau yal ngan ngồn bè broă lơh 2 anih pà xang ờ sa priă ai làng bol đì rơndeh măy rê hờ ƀòn tờm in bơh tiah geh kòp tàm ală càr tiah đah jum dà lơgar. Jăt mờ hơ̆, 2 anih ơm rlô jơng mờ dong kờl tuh xang ờ sa priă tàm càr Kon Tum geh lơh tàm 2 gơl gùng rơndeh dờng.

Dong kờl xang zờu ờ sa priă ai làng bol in tàm Hìu tăc xang zờu 124

Gơwèt mờ gơl gùng rơndeh dờng 14- gùng Hồ Chí Minh là tàm Hìu tăc xang zờu 124, gơl gùng Kơi sồ 1475, gơwèt thôn Dục Nội, xã Đăk Nông, kơnhoàl Ngọc Hồi. Gơwèt mờ gơl gùng rơndeh dờng 24 là tàm Hìu tăc xang zờu 118, gơl gùng Kơi sồ 117 mờ 237, gơwèt thị trấn Măng Đen, kơnhoàl Kon Plông. Jơh ală làng bol đì rơndeh măy rê hờ ƀòn tờm bơh tiah geh kòp ală càr tiah đah jum dà lơgar, tŭ lòt tus 2 anih ơm rlô jơng do, geh dong kờl gời tơl nơm rơndeh in 2 lĭt xang mờ geh ngui ală drơng broă ƀươn kuơ tàm hìu tăc xang.

Cau lơh broă bơh Hìu tăc xang zờu dê lơh jăt niam broă lơh rơcăng sơndră kòp rơcăng dong kờl làng bol in

Kơno yal, Anih tăc xăng zờu Kon Tum neh lơh jăt broă dong kờl xang ai làng bol rê hờ ƀòn tờm in bơh tiah geh kòp tàm 2 Hìu tăc xang xờu do bơh ngai 25/7. Mìng is ngai 29/7, 2 Hìu ràng tăc xang zờu do mờ Anih tăc xang zờu Kon Tum dê neh wă rò 850 nă làng bol mờ dong kờl xang ờ sa priă ai 390 nơm rơndeh măy in.

 Cau mblàng Lơ Mu K’Yến