VOV4.K’ho - Drim òr (14/05), tàm ƀlàng tơ̆p ƀồc cau ling chơ̆t màng càr Kon Tum, Thành ủy, HĐND, UBND, UBMT dà lơgar Việt Nam ƀòn dờng Kon Tum neh bơyai lơh còp, ies, tơ̆p 2 ƀồc ntìng cau ling chơ̆t màng tàm ală rài tam lơh pa geh jòi gŏ tàm ƀòn dờng do.

                                               Dơ̆ bơyai lơh ies, tơ̆p ƀồc ntìng cau ling chơ̆t màng

Bàr ƀồc ntìng cau ling chơ̆t màng geh Mpồl đơng lam ling klàng ƀòn dờng Kon Tum pơgồp bal mờ Mpồl đơng lam ling klàng xã Ngọc Bay mờ Kroong jòi rồ geh tàm ală ngai bồ nhai 7 bơh jơnau yal làng bol kis tàm do dê. Jơnau yal bơh Mpồl đơng lam ling klàng ƀòn dờng Kon Tum pà gĭt, ƀồc ntìng ală cau ling chơ̆t màng geh jòi gŏ tàm bơtô tam lơh. Phan gam wơl geh ào, mpha cau ling mờ jơh bàr ƀồc ntìng cau ling chơ̆t màng tŭ do nđờm ờ hềt gĭt măt sơnđan.

Tàm rài tam lơh mờ ling lơgar Mỹ sò tơm tơnklàs dà lơgar tàm ƀòn dờng Kon Tum, càr Kon Tum là tiah tam lơh cui rơcai ngan. Rơlao 46 nam tơnơ̆ mờ ngai đah jum dà lơgar geh tơnklàs, dà lơgar tơrgùm bal, Đảng bộ, gơnoar atbồ, mpồl lơh broă geh gơnoar bal mờ làng bol kis tàm ƀòn dờng Kon Tum gam pơn jăt tai jòi, rồ tơrgùm ƀồc ntìng ală cau ling chơ̆t màng gam ờ hềt jòi gŏ tàm tiah tam lơh.

Cau mblàng Ndong Brawl