VOV4.K’ho- Drim ngai 28/4, tàm ƀòn dờng Kon Tum, Hội đồng Nhân dân càr Kon Tum khóa 11 mut pơrjum dơ̆ 12, kung là dơ̆ pơrjum tơn jơh tơngai lơh broă bơh nam 2016 tus nam 2021. Bơh bồ tơngai lơh broă tus lài mờ pơrjum dơ̆ 12 tơn jơh tơngai lơh broă, Hội đồng Nhân dân càr Kon Tum khóa 11 neh bơyai lơh geh cồng nha 19 dơ̆ pơrjum, tàm hơ̆ geh 11 dơ̆ pơrjum ờs mờng mờ 8 dơ̆ pơrjum tơngume; ai tơlik 299 Nghị quyết lơh bơnàng jă nàng ală gah broă lơh, ală kấp lam lơh jat. Ală Nghị quyết Hội đồng Nhân dân càr Kon Tum ai tơlik geh đơs là neh di tŭ lam lơh jat ngan ngồn gùng dà, broă lơh bơh Đảng, bơta dong kờl, adat boh lam bơh dà lơgar dê, di mờ bơta geh ngan bơh càr dê, mhar ngui ngan ngồn tàm rài kis geh mpồl lơh sa kă bro, cau tĕ khà mờ làng bol ring bal.

Tàm tơngai 2 ngai geh lơh pơrjum dơ̆ 12, Hội đồng Nhân dân càr Kon Tum khóa 11 geh sền sơ wì 65 tơngume, geh 14 jơnau yal mờ 51 sră yal, jơnau rơcang cih Nghị quyết. Tàm hơ̆ uă tơngume dờp geh bơta sền gròi bơh cau tĕ khà mờ làng bol tàm càr dê, bè: Broă ai mờ ngui khà priă ai broă drơng ala rơwah cau bơsram ală kấp bơsram; bè dong kờl mpồl lơh sa kă bro dềt mờ dimơ tàm càr Kon Tum tơngai bơh nam 2021 tus nam 2025; Kơrnuat bè gùng dà bơcri priă, tam gơl gùng dà bơcri priă gơ wèt tus mờ 2, 3 rơndap broă gơwèt gơnoar bơh Hội đồng Nhân dân càr dê.

Cau mblàng K’Duẩn