VOV4.K’ho- Tàm càr Kon Tum, broă dong kờl ai cau lơh broă, mpồl ngui cau lơh broă gơtìp gơ rềng tài bơh kòp Covid-19 in jat jơnau đơng lam bơh Chính phủ dê gam pơn jat tai geh lam lơh jal mhar mờ gàr di cau geh dờp bơta dong kờl.

Lơh jat Nghị quyết sồ 68 mờ Kơrnuat sồ 23 bơh Chính phủ dê bè 2, 3 broă lơh dong kờl cau lơh broă mờ cau ngui cau lơh broă gơtìp kal ke tài bơh kòp Covid-19, tus tŭ do, mờr 880 mpồl lơh sa kă bro mờ rlau 16 rbô nă cau lơh broă tàm càr Kon Tum neh geh dong kờl mờ khà priă rlau 5 tơmàn 200 tơlak đông. Bal mờ dong kờl cau lơh broă jat Nghị quyết sồ 68 mờ Kơrnuat sồ 23, lơh jat Nghị quyết sồ 116 bơh Chính phủ dê, càr Kon Tum geh rlau 17 rbô nă cau lơh broă gam blơi Bảo hiểm ờ geh broă lơh geh dong kờl khà lơyah ngan rlau jơh là 1 tơlak 800 rbô đông mờ uă ngan rlau jơh là 3 tơlak 300 rbô đông dùl nă cau. Tus nggùl nhai 10 pa do, neh geh rlau 1 rbô 800 nă cau lơh broă bơh càr dê geh dờp broă dong kờl mờr 4 tơmàn 600 tơlak đông bơh Kes priă bảo hiểm ờ geh broă lơh.

Cau mblàng K’Duẩn