VOV4.K’ho- Tàm tŭ tơngai sơlơ tơnguh ală broă lơh rơcang sơndră kòp Covid-19, gah Công thương càr Kon Tum neh rơcang lài sền gròi, tam pà khà tac phan bơna nàng gàr kơ̆ kơljap drà kă bro.

Sở Công thương Kon Tum neh lơh broă mờ tơl mpồl tac phan nàng tơnguh khà phan bơna prap rơcang gàr lài, gàr tơl jat jơnau kờñ ngui sa mờ lơh gơlik nùs nhơm iang nùs ai làng bol in tàm tơngai lơh jat ală broă lơh rơcang sơndră kòp Covid-19. Tŭ do, ală siêu thị, ală tiah tờm kă bro, ală mpồl tac phan kung neh rơcang lài prap phan bơna li la, gơguh bơh 15 tus 20% pơn drờm mờ jơnau kờñ ngai ờs. Tàm ală drà ờs mờng, khà phan kung li la, drơng jơnau kờñ blơi phan pah ngai bơh làng bol dê.

Cau mblàng K’Duẩn