VOV4.K’ho- Klo ngai 21/10, dùl nă kơnòm bơsram ơdŭ 12C2, Hìu bơsram Kấp pe Trần Quốc Tuấn tàm thị trấn Đăk Hà, kơnhoàl Đăk Hà, càr Kon Tum geh cồng nha xét nghiệm bơtờp mờ virus Sars CoV-2. Jơnau yal bơh Mpồl Kuang ătbồ hìu bơsram dê pà gĭt, 50 nă kơnòm bơsram mờ cau pơgru ơm rềp mờ kơnòm bơsram do geh pơhìn bơtờp kòp pal lơh jăt jơnau sồr ơm yah ngài tơrgùm bal nàng rơcăng sơndră kòp.

Hìu bơsram Kấp pe Trần Quốc Tuấn

Lài hơ̆, Mpồl Kuang ătbồ Hìu bơsram Kấp pe Trần Quốc Tuấn neh ai khà kơnòm bơsram mờ cau pơgru ơm rềp mờ kơnòm bơsram là F0 in lơh jăt jơnau sồr ơm yah ngài tàm hìu. Bơh mho ngai 21/10, Hìu bơsram Kấp pe Trần Quốc Tuấn tam gơl broă lơh bơto bơsram bơh tàm internet. Anih tờm Gròi sền kòp tê jê să càr Kon Tum mờ mpồl cau lơh sơnơm bơh kơnhoàl Đăk Hà dê neh tus kờp sền wơl cau pal lơh jăt jơnau sồr ơm yah ngài tơrgùm bal mờ ai mẫu xét nghiệm tàm Hìu bơsram Kấp pe Trần Quốc Tuấn.

Ai mẫu xét nghiệm tàm Hìu bơsram Kấp pe Trần Quốc Tuấn

Kơno yal, oh L.T.H.G ờ hềt geh cĭt vaccine, bơtờp kòp Covid-19 bơh bi ùr ơm kis tàm sơnah ƀòn Tân Phú, ƀòn dờng Đồng Xoài, càr Bình Phước rê, neh lơh sir jơnau sồr ơm yah ngài tơrgùm bal. Gah lơh sơnơm càr Kon Tum mờ mpồl lơh broă geh gơnoar càr Kon Tum gam sơrbac mhar lam jòi cau ơm rềp, ai mẫu xét nghiệm ală cau geh pơhìn bơtờp kòp bơh 5 nă cau F0. Bơh sơnrờp, mpồl lơh broă geh gơnoar jòi bàn geh pơgăp 230 nă cau là F1.

Cau mblàng Lơ Mu K’Yến