VOV4.K’ho- Tàm mho mang ngai 07/10, tàm tiah tơnau dà tiah tàm dơlam hìu măy pờ tơlik ồs đèng Plei Krông, gơl gơwèt thôn 3, xã Hà Mòn, kơnhoàl Đăk Hà, càr Kon Tum neh gơlik geh dùl dơ̆ gơlơ̆p plung lơh 2 nă cau roh thĭt. Jat jơnau yal bơh UBND xã Hà Mòn, kơnhoàl Đăk Hà, tàm klo ngai tiah do geh dùl mpồl 7 nă ơruh pơnu bơyai was plung đàr ka tàm tiah do mờ bơya lơh ñô sa tàm tiah do tơn.

Mpồl lơh broă geh gơnoar lòt jòi dong rềs àr ờs mờng tus bal lòt jòi cau gơbàn rềs àr

Tus mho mpồl ơruh pơnu was plung rê wơl kềng gah tơnau dà mờ geh 4 nă cau rê lài. 3 nă cau gam wơl tài bơh geh cau lời huĭ điện thoại den was plung trơ wơl wơl nàng jòi. Tŭ plung ngài mờ kềng gah tơnau dà pơgap 30 thơk den nisơna gơtìp gơlơ̆p mờ mìng 1 nă tàm khà 3 nă cau do geh re tus kềng gah tơnau dà, 2 nă cau gam wơl roh thĭt. Tơnơ̆ tŭ dờp geh jơnau yal bè dơ̆ bŭ dà, gơnoar atbồ xã Hà Mòn, kơnhoàl Đăk Hà neh hòi tơn mpồl cau tàm tiah do mờ pơgồp bal mờ mpồl Kuang àng bơyai lơh lòt jòi cau gơbàn rềs àr. Tus rlau 12 jiơ, jơnau yal bơh tiah gơbàn rềs àr pà gŏ mpồl dong kờl kung ờ hềt jòi gŏ sơl bồc ală cau chơ̆t bŭ dà dê.

Cau mblàng K’Hạnh