VOV4.K’ho- Tàm ală ngai rềp ndo, càr Kon Tum sùm gŏ ală cau F0 geh gŏ tàm tiah ơm yah ngài mờ tàm mpồl bơtiàn. Tềng đăp bơta do, gơnoar ătbồ bal mờ mpồl lơh broă geh gơnoar bơh càr dê sơlơ gròi sền nàng kờñ kơryan tiah bơtờp kòp Covid-19. Tàm Pơrjum tàm jàu broă lơh sră ƀăo nhai 10, geh Ban Tuyên giáo Tỉnh ủy Kon Tum dê bơyai lơh tàm ngai 28/10, ồng Nguyễn Đình Cầu- Phó Kuang ătbồ Cơldŭ lơh broă Ủy ban Nhân dân càr Kon Tum yal, càr Kon Tum pơn jăt tai gàr sùm anih gròi sền kòp tàm ală gơl gùng rơndeh dờng mŭt tàm càr.

Dùl tiah jăt sền pràn kơldang să jan mpồl bơtiàn tơnơ̆ tơngai ơm yah ngài tơrgùm bal tàm sơnah ƀòn Lê Lợi, ƀòn dờng Kon Tum

Nùs nhơm bơh càr dê, do là ală anih gròi sền kòp ờ gŏ di là anih gròi sền gùng lòt den tàng càr geh ờ tă sang jăt bè jơnau đơs bơh Bộ Giao thông Vậ tải dê. Bàr ngai pa do, tàm Anih gròi sền kòp sồ 01 Sao Mai, ƀòn dờng Kon Tum mờ Anih gròi sền kòp sồ 02 kuèl kơh Lò Xo, kơnhoàl Đăk Glei tàm gùng Hồ Chí Minh neh gŏ 3 nă cau bơtờp mờ virus Sars CoV-2, tàm hơ̆ geh 01 nă cau bơh Hà Nội rê mờ 02 nă cau bơh càr Dăk Lăk tus. Tềng đăp bơta làng bol jơh tơngai ơm yah ngài tơrgùm bal rê lơh jăt jơnau sồr ơm yah ngài, jăt sền bơta pràn kơldang să jan tàm hìu hơ̆ sồng gŏ bơtờp mờ virus Sars CoV-2 gơlam tus lơh bơtờp kòp tus mpồl bơtiàn, bàr pe kơnhoàl, ƀòn dờng bơh càr Kon Tum dê hòi jà làng bol cih mat dan ơm is wơl tàm tiah ơm yah ngài tơrgùm bal 07 ngai tai.

Tus tŭ do, càr Kon Tum geh 328 nă cau bơtờp kòp Covid-19, tàm hơ̆ geh 222 nă cau kòp, 106 nă cau bơtờp wơl. Tàm khà ală cau kòp geh 206 nă cau gŏ tàm ală tiah ơm yah ngài tơrgùm bal, 15 nă cau gŏ tàm mpồl bơtiàn mờ 01 nă cau gŏ tàm tiah ơm yah ngài lơh sơnơm.

Cau mblàng Lơ Mu K’Yến